Qyzylordada úsh jylda 99 joba iske qosylady
QYZYLORDA. QazAqparat- Oblysta aýylsharýashylyq óndiristik keshenin damytý men eksporttyq áleýetti arttyrý baǵytynda 2017-2020 jyldar aralyǵynda 30 mlrd teńge kólemindegi 99 jobany júzege asyrý josparlanýda. Bul týraly oblystyq aýylsharýashylyǵy basqarmasynyń esebinde baıandaldy, dep habarlady QazAqparat.
Shıeli kentinde JK «Móldir ı K» qýattylyǵy jylyna 3,5 mln dana jumyrtqa óndiretin qus fermasyn iske qosty. Qazirgi tańda qus fermasynda 11 myń bas taýyq jumyrtqa salýda. Jyl sońyna fermany 65 tonna qus etin óndirýge baǵyttap, jobany keńeıtýdi mejeleýde.
Sondaı-aq, kentte shubat óńdeý tsehy iske qosyldy. Búgingi kúni tseh bazasynda «Tórt túlik» AÓK qurylyp, táýligine 1 tonna shubat ónimderin óndirip otyr.
Qyzylorda qalasynda JK «Natıshaeva» 5 gektar aýmaqqa 120 jylyjaı keshenin, 1 gektarǵa kókónis jáne baqsha daqyldaryn ósirý jobasyn iske qosty. Qazirgi ýaqytta jóndeý jumystary tolyq aıaqtalyp, 46 jylyjaıǵa kókónis otyrǵyzylyp, jumystary jalǵasýda.
Sonymen qatar, osy jyly avtomattandyrylǵan 1 jylyjaı, qýattylyǵy jylyna 1500 tonnalyq qus etin óndiretin qus fabrıkasy, qoı bordaqylaý alańy men jylyna 250 tonna qozy etin óndiretin keshen, jyldyq qýattylyǵy 2 myń tonna et kombınaty jáne 200 gektar tamshylatyp sýarý ádisimen qyzanaq ósirý jobasyn júzege asyrý josparlanýda.
