Qyzylordada úsh jylda 7 myń otbasy baspanaly boldy
QYZYLORDA. QazAqparat - Táýelsizdiktiń alǵashqy jyldarynda Qyzylordada jalpy aýdany 8160 sharshy metr turǵyn úı paıdalanýǵa berilse, bıyldyń ózinde 80 kópqabatty turǵyn úı salyndy.
Oblysta salynyp jatqan qurylystardyń 80 paıyzy Qyzylorda qalasynyń úlesinde. Sońǵy 3 jyldyń ishinde Qyzylordada jańadan 11 shaǵyn aýdannyń boı kóterip, 7 myńǵa jýyq otbasynyń jańa páterge ıe bolýy myńdaǵan otbasynyń berekesin arttyrdy, - dep habarlady QazAqparat tilshisi oblystyq ákimdikke silteme jasap.
Qaladaǵy 54 mekteptiń 22-si, 26 memlekettik balabaqshanyń 18-i táýelsizdik jyldarynda paıdalanýǵa berilgen. Munan bólek, 194 jeke balabaqsha jumys jasaýda.
Qyzylordanyń jaqyn bolashaqtaǵy damý úrdisi álemge aty áıgili qalalardyń, el baıtaǵy - Astananyń úlgisimen Syrdarııa ózeniniń sol jaǵalaýyna qaraı baǵyttalmaq. Joba boıynsha Syrdarııa ózeniniń sol jaq bóliginde etno-mádenı ortalyqtar, áleýmettik nysandar, saýda, saýyqtyrý oryndary men qonaq úı keshenderi jáne basqa da bıznes ortalyqtar salý kózdelgen.
Jalpy qalanyń sol jaǵalaýyn damytý barysynda qazaqtyń ulttyq jáne shyǵys pen klassıkalyq sáýlet óneriniń elementteri qoldanylady. Joba iske asa bastaǵanda Syrdyń bas qalasy búgingiden de basqa jańasha kelbetke ıe bolady.
