Qyzylordada úsh jylda 132 kóshe jóndeletin boldy

QYZYLORDA. QazAqparat - Qyzylorda qalasynda aldaǵy úsh jylda 132 kóshe jóndeletin bolady. Bul shaǵyn joldardy damytý baǵdarlamasy boıynsha júzege asady, dep habarlaıdy QazAqparat tilshisi.

Oblys ortalyǵynda shaǵyn joldardy damytý baǵdarlamasy ázirlendi. Osynyń aıasynda Qyzylorda qalasyndaǵy shaǵyn aýdandar men qalaǵa qarasty eldi mekenderdegi joldar máselesi óz sheshimin tabady. Bıyl 56 kóshe boıynsha osyndaı jumystar atqarylsa, 2020 jyly - 35, 2021 jyly 41 kóshe el ıgiligine beriledi.

«2022 jylǵa deıin shaǵyn joldardy damytý baǵdarlamasy boıynsha qalanyń shaǵyn aýdandarynda jáne qala mańyndaǵy aýyldarda 132 kóshede qurylys-jóndeý jumystary júrgiziletin bolady. Eń bastysy, barlyq jumystar merziminde sapaly oryndalýy tıis, laýazymdy tulǵalar jumystardyń tıisti deńgeıde atqarylýyna jaýapty bolady», - dedi Qyzylorda oblysynyń ákimi Qyrymbek Kósherbaev turǵyndarmen kezdesý barysynda

Oblys ákimi Qyzylorda qalasyndaǵy «Saıahat», «Sáýlet», «KBI» sekildi birqatar shaǵyn aýdandarynda bolyp, jergilikti turǵyndarmen júzdesti.

Qyzylorda qalasynda jalpy uzyndyǵy 619 shaqyrymdy quraıtyn 766 kóshe bar. Onyń ishinde 409-i asfalt-betondy, 35-i qıyrshyq tasty jáne 322-i qara jol bolyp tabylady.