Qyzylordada úsh jasóspirim qyz eki kúnnen beri tabylmaı jatyr
QYZYLORDA. QazAqparat - Qyzylorda qalasyndaǵy otbasy úlgisindegi «Atameken balalar aýyly» úıinde tárbıelenip jatqan úsh jasóspirim qyz eki kúnnen beri tabylmaı jatyr, dep habarlaıdy QazAqparat tilshisi.
Qyzylorda qalalyq polıtsııa basqarmasynyń málimetinshe, 15-16 jastaǵy úsh jasóspirim — Dilda Musabekqyzy Nugmanova, Lıýbov Nestorova jáne Rano Sabankýlova Qyzylorda qalasyndaǵy «otbasy úlgisindegi Atameken balalar aýylynda» tárbıelenedi.
Jasóspirim qyzdar 25 naýryzda túngi ýaqyt 02.00 shamasynda belgisiz baǵytqa shyǵyp ketip, sodan qaıta oralmaǵan. Qazirgi tańda qalalyq polıtsııa basqarmasynyń jeke quramy kámeletke tolmaǵan úsh jasóspirimdi izdep tabý maqsatynda izdestirý jumystaryn júrgizýde.
«Osy maqsatta oblys ortalyǵyndaǵy kópqabatty úılerdiń shatyrlary, saıajaılar, tastandy úıler men qurylysy bitpegen ǵımarattar, oıyn-saýyq ortalyqtary men jaldamaly páterler tekserilýde. Olardyń fotosýretteri kórsetilip, surastyrý jumystary júrgizilýde. Bul jumystar oblystyq polıtsııa departamenti bastyǵynyń baqylaýynda. Úsh jasóspirim qyz jóninde qandaı da bir aqparat anyqtalǵan jaǵdaıda Qyzylorda qalalyq Polıtsııa basqarmasynyń kezekshi bóliminiń 29-75-20 telefonyna nemese 102 arnasyna shuǵyl túrde habarlasýlaryńyzdy suraımyz», - dep málim etti Qyzylorda qalalyq polıtsııa basqarmasynan.
Budan buryn Qyzylordada tańǵy saǵat 6-da úıden shyǵyp, joǵalyp ketken bes jasar bala tabylǵan bolatyn.
