Qyzylordada úsh kún buryn sýǵa ketken balanyń máıiti tabyldy
NUR-SULTAN. QazAqparat - Qyzylorda qalasynda úsh kún buryn kanalǵa sýǵa aǵyp ketken on jastaǵy balanyń máıiti tabyldy, dep habarlaıdy QazAqparat tilshisi.
Esterińizge sala ketelik, Oqıǵa 23 mamyrda jergilikti ýaqytpen saǵat 18.00 shamasynda boldy. Qyzylorda qalasyna qarasty Tasbóget kentindegi kanalǵa shomylǵan úshinshi synyp oqýshysy sýǵa aǵyp ketken. Balany izdestirýge 53 adam jumyldyryldy.
«Qyzylorda oblystyq tótenshe jaǵdaılar departamentiniń daǵdarys jaǵdaılarynda basqarý basqarmasyna jergilikti turǵynnan jergilikti ýaqytpen saǵat 17.38-de qalaǵa qarasty Abaı aýyly turǵynynan habar kelip tústi. Onda «Eshpan» kúrish alqaptaryn sýarmaly kanalynda jasóspirimniń máıiti tabylǵany aıtylǵan. Ol Tasbóget kenti aýmaǵyndaǵy kanaldyń sýǵa túsýge arnalmaǵan aýmaǵynda sýǵa batyp ketken 2010 jylǵy jasóspirimniń máıiti ekeni anyqtaldy. Máıit Qyzylorda oblysy tótenshe jaǵdaılar departamenti jedel qutqarý jasaǵynyń qutqarýshylarymen sýdan shyǵaryldy», - dep málim etti Qyzylorda oblystyq tótenshe jaǵdaılar departamenti órt sóndirý jáne apattyq-qutqarý jumystary qyzmetiniń baspasóz hatshysy Álııa Erejepova.
Vedomstvonyń málimetinshe, jyl basynan beri oblysta 7 adam sýǵa ketti. Byltyr bul jaǵdaıdan barlyǵy 26 adam qaza tapsa, onyń 10-y bala.
«Aımaqta áli sýǵa túsý maýsymy bastalǵan joq. Sondyqtan turǵyndardan qaýipsizdik sharalaryna nazar aýdarýyn suraımyz», - dedi departament mamandary.
