Qyzylordada úsh býynǵa jalǵasqan polıtseıler áýleti turady
Ábýseıit aǵamyz 1938 jyly dúnıege kelgen. Búginde seksen jastyń seńgirine shyqty. Ol kisi ishki ister salasynda alǵash jıyrma eki jasynda qadam basty. Bul 1960 jyl bolatyn. Eńbek jolynda talaı qıyndyqty bastan ótkizdi. Túıinin sheshý qıynǵa aınalǵan kóptegen qylmystyń betin ashty. Aǵamyz bul salaǵa úsh jyldyq áskerı boryshyn ótegennen keıin qyzmetke keldi. Sol bir shaqta aýdandyq ishki ister bóliminde qyzmet etetin saqshylardyń ózi sanaýly. Aýdan boıynsha barlyǵy 12 adam ǵana qoǵam qaýipsizdigin kúzetedi. Soǵan qaramastan olar ýaqytpen sanaspaı, árbir qylmystyń ýaqytyly ashylýyna qoldan kelgenshe úles qosty. Saqshy qyzmetine kelgen jas maman odan keıin Almaty qalasynda oryn tepken mılıtsııa mektebin syrttaı támamdap shyqty. Ol ýaqytta bári tapshy. Qazirgideı qyzmettik kólik te jetise bermeıdi. Búginde polıtsııa qyzmetiniń jumysyn júıeli júrgizýge oń septigin tıgizip júrgen san alýan qural-jabdyqtar ol kezeńde qur ásheıin qııal ǵana kórinetin.
Ábýseıit aǵamyz 1970 jyly Pavlodar qalasyndaǵy mılıtsııa mektebiniń alty aılyq kýrsyn da támamdap shyqty. Onda sambo sportynyń qyr-syryna molynan qanyqty. Sol úırengeni qylmyskerlerdi quryqtaýda ózine kóp septigin tıgizdi. Ol kezde ýchaskelik ınspektor MAI qyzmetkeriniń de jumysyn atqara beretin. Syrdarııa ózeniniń Jańaqorǵan kenti tusynan ótetin kópirdiń ústinde qyzmetin atqaryp turǵan edi. Kópir ústinen ótken mototsıkldiń birinde qapshyq ishinen qosaýyzdy myltyqty kózi shalyp qaldy. Álgi mototsıkldiń artynan qýa jóneldi. Ony júrgizip bara jatqan adam da birden berile qoıǵan joq. Ekeýi arpalysa ketti. Sambodan úırengen ádis-tásiliniń arqasynda álgi adamdy tyrp etkizbesten ustaı aldy. Osylaısha óziniń erjúrektiginiń arqasynda alda bolatyn qaýipti oqıǵanyń aldyn aldy.
Ýchaskelik ınspektor sol kezeńde aýdanda mal urlyǵy kóp kezdesetinin aıtady. Sol qylmystyń ashylýyna zor úlesin qosty. Negizgi tirshilik kózi - tórt túlik ósirýmen tikeleı baılanysty jergilikti jurt oǵan talaı márte alǵysyn jaýdyrǵan edi. Іshki ister organyna 1960 jyly mılıtsıoner bolyp qabyldanǵan ol bólimniń qylmysty izdestirý, tergeý bólimshesinde abyroımen qyzmet atqardy. 1988 jyly aǵa ýchaskelik polıtsııa ınspektory qyzmetinen qurmetti zeınetkerlikke shyqty. Іshki ister organdaryndaǵy 28 jyl qyzmet atqarý kezinde óz qyzmetiniń naǵyz mamany ekendigin kórsete bildi. Atqarǵan eńbegine oraı kóptegen marapatqa ıe boldy.
Іshki ister salasynyń qart ardageri bıyl 15 tamyzda seksen bir jasqa tolady. Aǵamyz kezinde óziniń jolyn qýǵan ulyna atalmysh salada úırengen tájirıbesin molynan sińire bildi. Búginde sol tálimdi nemeresi Ermuhanbet te únemi esinde ustap keledi. 
Aǵamyzdyń 1968 jyly dúnıege kelgen uly Eraly áke jolyn laıyqty jalǵastyra bildi. Bul salaaa 1989 jyly kelgen ol Jańaqorǵan aýdandyq ishki ister salasynda nátıjeli qyzmet kórsetiti. 2012 jyly zeınetkerlikke shyqty. Óziniń qyzmetine zor jaýapkershilikpen qaraı bilgen ol jumysynda birde-bir tártiptik sharaǵa tartylǵan joq.
Búginde polıtsııa qyzmetindegi joldy atalmysh áýlettegi úshinshi býyn ókili Ermuhanbet jalǵastyryp otyr. Ol da jastaıynan polıtsııa bolýdy armandap ósti. Qazirgi tańda jergilikti polıtsııa qyzmeti ıývenaldy polıtsııa tobynyń ýchaskelik ınspektory qyzmetin abyroımen atqaryp keledi.
