Qyzylordada úsh birdeı kólikti qoldy qylǵan kúdikti quryqtaldy
Qyzylorda qalalyq polıtsııa basqarmasynyń krımınaldyq polıtsııa qyzmetkerleri qala ortalyǵynda oryn alǵan kólikti aıdap áketýdiń úsh deregin ashty. 27-naýryz kúni saǵat 04:06 shamasynda belgisiz adam kópqabatty úıdiń aýlasynda turǵan Nexia kóligin belgisiz baǵytqa aıdap ketken. Dál osy tektes derek boıynsha 11 sáýir kúni polıtsııa basqarmasyna jáne Aqsaı polıtsııa bólimine qala turǵyndary kelip, Shuǵyla móltek aýdany aýmaǵyndaǵy kóp qabatty turǵyn úı aýlasynda jáne jeke menshik úıdiń aldynda turǵan reseılik nómirli Nexia kólikteriniń esigin kiltpen irikteý arqyly ashyp, belgisiz baǵytqa aıdap ketkeni jóninde shaǵymdanǵan.
«Der kezinde polıtsııa qyzmetkerlerine izdeýge salynǵan kólik boıynsha baǵyt-baǵdar berildi. Qyzylorda qalalyq polıtsııa basqarmasy qyzmetkerleriniń is-áreketteriniń arqasynda kúdikti – 26 jastaǵy oblys turǵynyn Aral aýdandyq polıtsııa bóliminiń qyzmetkerlerimen birlesip quryqtady. Aıǵaq zat retinde urlanǵan kólikter tárkilendi. Tergeý barysynda osy derekterge qatysy bar basqa da adamdar tekserilýde», - delingen saıttaǵy jarııalanymda.
Atalǵan derekter boıynsha Qazaqstan Respýblıkasynyń Qylmystyq kodeksiniń 188-babynyń 3-bóligimen (Urlyq) sotqa deıingi tergep-tekserý áreketteri bastaldy. Kúdikti basqarmanyń ýaqytsha ustaý ızolıatoryna qamaldy.
