Qyzylordada úsh balasy ýlanyp kóz jumǵan otbasyna baspana berildi
QYZYLORDA. QazAqparat - Qyzylorda oblysynyń ákimi Qyrymbek Kósherbaev Aqsýat aýyldyq okrýginiń turǵyny Jámılá Sadýovaǵa jańa páterdiń kiltin tabystady. Bul týraly oblys ákiminiń baspasóz qyzmetine silteme jasap QazAqparat habarlaıdy.
«Jabyrqaǵannyń janynan tabylý, sharasyzǵa kómek qolyn sozý, qaıyrymdylyq jasaý - halqymyzdyń qanyna bitken asyl qasıetterdiń biri. Ózderińiz bilesizder, osydan birer aı buryn, úsh birdeı búldirshinimizden qapııada kóz jazyp qaldyq. Bul qaıǵyly jaǵdaı tek bir otbasynyń ǵana emes, tutas eldiń qabyrǵasyn qaıystyryp, eńsemizdi túsirdi. Biraq, Allanyń isine amal bar ma?! Halqymyzda «Qaıǵyny bólisseń azaıady» degen sóz bar. Olaı bolsa, sol úsh búldirshinimizdiń anasy Jámılá Sádýova qaryndasymyzǵa Syrdarııa ózeniniń sol jaǵalaýyndaǵy jańa qaladan 2 bólmeli páterdiń kiltin tabystaǵaly otyrmyz», - dedi aımaq basshysy.
Eske sala keteıik, aǵymdaǵy jyldyń 10 qańtarynda Qyzylorda qalasy Mahmutov kóshesindegi jeke úıden órt shyǵyp, 2011, 2012 jáne 2014 jyly dúnıege kelgen úsh bala ıis tıip qaza tapqan bolatyn. 
Sondaı-aq, jergilikti kásipkerler men qoǵam belsendileriniń demeýshiligimen 1600-den astam az qamtylǵan januıaǵa azyq-túlik paketteri taratyldy. Qaıyrymdylyq sharasy aıasynda qarjylyq kómek kórsetýdi qalaǵan jandar úshin «Aqmeshit-Syrdarııa» ortalyq meshiti aýmaǵynda arnaıy jáshik qoıyldy. Árbir mekenjaıǵa azyq-túlikterdi jetkizetin kólikter uıymdastyryldy.
Aıta keteıik, qaıyrymdylyq sharalaryn ótkizý aımaqta ıgi dástúrge aınalǵan. Kópbalaly otbasylarǵa qoldaý kórsetý maqsatynda aımaqta júıeli jumystar júrgizilýde: az qamtylǵan otbasylardyń, ásirese, aýyldyq jerden shyqqan talapty balalardy oqytýǵa oblys ákiminiń arnaıy granty taǵaıyndalyp keledi. Osy bilim grantynyń negizinde 2013 jyldan bastap 900 jýyq talapty jas elimizdiń beldi joǵary oqý oryndarynda bilim alýda.
