Qyzylordada urylar memleketke 30 mln teńge shyǵyn keltirgen

QYZYLORDA. QazAqparat - Suǵanaq qoldy azamattar Qyzylorda qalasyndaǵy «Báıterek» móltekaýdanyndaǵy káriz jáne sý júıeleri qaqpaqtaryn, sý eseptegish aspaptardy qoldy etip, 30 mln teńge shamasynda shyǵyn keltirgen, dep habarlaıdy QazAqparat tilshisi. 

«Báıterek» móltekaýdany osydan 2 jyl buryn paıdalanýǵa berildi. Onda jeke turǵyn úı salýǵa bolady. Móltek aýdanda barlyq jaǵdaı jasalǵan. Kommýnaldyq jáne káriz júıeleri tartylǵan. Jergilikti basshylyq mundaı is-sharalardy júzege asyrý maqsatynda 9 mlrd teńgeden astam qarjy jumsady. Sonyń nátıjesinde munda 6 myńnan astam otbasy turǵyn úı salýǵa múmkindik aldy. Degenmen osy aýmaqta suǵanaq qoldylar ortaq múlikti qoldy etip jatyr.

«Báıterek» móltekaýdanynyń turǵyndaryna kezinde qolaıly jaǵdaı jasaldy. Sý, elektr jelileri tartyldy. Alaıda qazir 534 eseptegish aspap, 7 myń metrden astam elektr kabeli, káriz jáne sý júıeleriniń qaqpaqtary qoldy bolǵan», - deıdi qalalyq qurylys jáne arhıtektýra bóliminiń mamany Aqbolat Turmahanov.

Qazirgi tańda jergilikti tártip saqshylary osyndaı qylmystarǵa qatysy bar degen kúdikpen 3 adamdy quryqtady. Olar urlanǵan dúnıelerdi metall qabyldaý oryndaryna ótkizip jibergen. Olardyń ústinen 188-bap negizinde qylmystyq is qozǵaldy.