Qyzylordada «Ýnıversıtet arýy-2017» anyqtaldy
QYZYLORDA. QazAqparat - Qorqyt Ata atyndaǵy Qyzylorda memlekettik ýnıversıtetiniń «Qyz Jibek» qyzdar klýby dástúrli «Ýnıversıtet arýy - 2017» baıqaýyn uıymdastyrdy, dep habarlady QazAqparat HAA tilshisi.
Baıqaýda tal shybyqtaı buralǵan, aqylyna kórki saı 15 qyz óz ónerlerin ortaǵa salyp, túrli saýaldarǵa múdirmesten jaýap berdi. Osy ýaqytqa deıin 40 qyzdyń ishinen iriktelgen arýlar sahnadaǵy tapqyrlyqtary men tabandylyqtarynyń arqasynda ózderiniń osal emestikterin ańǵartty.
Kórermender kóp jınalǵan baıqaýda jankúıerler erekshe belsendilik tanytty. Otyzdan asa demeýshi baıqaýdyń joǵary deńgeıde ótýine atsalysty.
Ádil qazylar alqasynyń qorytyndysymen fılologııa, tarıh jáne quqyq fakýltetiniń 1-kýrs stýdenti Aıjan Aıaǵanqyzy «Ýnıversıtet arýy - 2017» atansa, osy fakýltettiń stýdenti Ardaq Talantqyzy birinshi vıtse-mıss tıtýlyna laıyq dep tanyldy. Al horeografııa mamandyǵynyń 2-kýrs stýdenti Arýjan Meıirbekqyzy ekinshi vıtse-mıss ataǵyn mise tutty. Sondaı-aq «Kórermender kózaıymy» nomınatsııasy jaratylystaný fakýltetiniń stýdenti Aıdana Ábıbollaqyzyna, «Qyz Jibek arýy» nomınatsııasy Aınur Amantaıqyzyna buıyrdy.
