Qyzylordada Ýnıversıada alaýy jaǵyldy
QYZYLORDA. QazAqparat - Búgin Qyzylordada 28 qańtar men 8 aqpan aralyǵynda Almaty qalasynda ótetin XXVIII qysqy Ýnıversıadanyń alaýy jaǵyldy. Bul týraly QazAqparat HAA tilshisi habarlady.
Álemdik dodanyń aımaqtyq shtabtary jasaqtaǵan estafeta baǵdaryna sáıkes uıymdastyrylǵan shara Qazaqstan Respýblıkasynyń Tuńǵysh Prezıdenti atyndaǵy saıabaqtan bastaý aldy.
Estafeta alaýy mańyna jınalǵan kópshilik áýeli shaǵyn kontserttik baǵdarlamany tamashalady. Saltanatty sharany oblys ákimi Qyrymbek Kósherbaev ashty. Aımaq basshysy óz sózinde el sportynyń baǵyndyrǵan bıikterin atap ótti. XXVIII qysqy Dúnıejúzilik Ýnıversıadany ótkizý Qazaqstandy álde de jalpaq álemge tanyta túsetin jetistik ekendigine toqtaldy. 
- Álem jurty kóz tikken Ýnıversıadanyń sátti ótýine tilek qosamyz. Bul aıtýly sharada jastyq pen dostyq jeńedi degen oıdamyz, - dedi aımaq basshysy.
Oblys ákiminiń lebizinen keıin XXVIII qysqy Dúnıejúzilik ýnıversıada gımni oınatyldy. Syr jerindegi Ýnıversıada alaýynyń jaǵylý saltanaty elimizge belgili jeńil atlet, Ýnıversıada dırektsııasynyń ókili Ómirserik Bekenovtiń alaýdy oblys ákimi Qyrymbek Kósherbaevqa tapsyrýymen túıindeldi. Osydan keıin oblysymyzdan alaýdy alyp júrý qurmetine ıe bolǵan azamattar legi «Bolashaq» ýnıversıtetinde qaraı jol tartty. Sharanyń birinshi kezeńi «Bolashaq» ýnıversıtetiniń aldynda máresine jetedi. Estafetanyń ekinshi kezeńi saǵat 14-00 «Aqmeshit» ınstıtýty aldynda jalǵasyn tabady. 
