Qyzylordada Uly Jeńistiń 72 jyldyǵy atalyp ótti

QYZYLORDA QazAqparat-9 mamyr kúni Qyzylordada Uly Jeńistiń 72 jyldyǵyna arnalǵan mıtıng ótti, dep habarlady QazAqparat HAA tilshisi.

Merekelik shara jyl saıynǵy dástúrge sáıkes Qyzylordanyń ortalyq kóshelerimen júrip ótetin «Jaýjúrek polki» sherýimen bastaldy.  Sherýge qatysýshylar Ekinshi dúnıejúzilik soǵys pen Aýǵan soǵysynda qaza tapqandardyń, sondaı-aq Otanǵa oralǵannan keıin dúnıeden ótken bozdaqtardyń  foto sýretterin alyp júrdi.

  Oblys ákimi Qyrymbek Kósherbaev jáne ózge de qatysýshylar «Máńgilik alaý» memorıalyna gúl shoqtaryn qoıyp, soǵysta qaza tapqandardy bir mınýt únsizdikpen eske aldy.

«Jeńistiń 72 jyldyǵyn toılaı otyryp, biz onyń qandaı qıyndyqtarmen kelgendigin eshqashan esten shyǵarmaýymyz kerek. Biz soǵys dalasynda kóz jumǵandar men osy kúndi ańsap ketkenderge tıisti qurmet kórsetemiz. 72 jyldyqty toılaı otyryp, soǵys dalasynda janqııarlyqpen erlik kórsetken, tylda, zaýyt, kolhoz, ferma men ǵylymı zerthanalarda aıanbaı eńbek etkenderdiń rýhyna basymyzdy ıemiz», - dedi oblys ákimi.

 Shara sońynda  soǵys, tyl jáne eńbek ardagerlerine  arnaıy tigilgen  shatyrlarda  soldat botqasynan  dám  usynyldy.