Qyzylordada «Uly dalanyń sarqylmas úni» atty óner ekspedıtsııasy ótkizildi
Atalmysh ıgi shara Tuńǵysh Prezıdent - Elbasy Nursultan Nazarbaevtyń «Bolashaqqa baǵdar: rýhanı jańǵyrý» jáne «Uly dalanyń jeti qyry» maqalalary aıasynda júzege asyryldy. Ony Qyzylorda oblystyq «Rýhanı jańǵyrý» ortalyǵynyń mamandary uıymdastyrdy.
Óner ekspedıtsııasyna Qyzylorda qalasyndaǵy Qazanǵap atyndaǵy mýzykalyq kolledj stýdentteri qatysty. Bul sharanyń negizgi maqsaty - jas órenderdiń qazaqtyń aspaptyq mýzykaǵa degen qyzyǵýshylyǵyn oıatyp, ulttyq ónerge degen qurmetterin arttyrý. Ekspedıtsııa músheleri atalmysh mádenı sharany aldymen Jalaǵash aýdanyndaǵy «Aqterek» saýyqtyrý lagerinen bastady. Ónerpazdar dombyra, adyrna, jetigen, qobyz, kerneı, úskirik jáne sazgen sekildi qazaqtyń ulttyq mýzykalyq aspaptarymen «Qusnı qorlan», «Halqym-aı», «Jyr bastaý» shyǵarmalaryn naqyshyna keltirip oryndady. Sondaı-aq folklorlyq ansambldiń oryndaýyndaǵy Qurmanǵazynyń «Balbyraýyn», «Saryarqa» kúıleri jas órenderdiń kóńilinen shyqty.
Lagerde dem alyp jatqan jas órender aldynda oblystyq «Rýhanı jańǵyrý» ortalyǵynyń bólim basshysy Álıma Ábdiqalyqova sóz aldy. Ol kisi ulttyq ónerdiń jas urpaqqa tıgizetin paıdasy jóninde áńgimelep berdi.
«Tuńǵysh Prezıdent - Elbasy Nursultan Nazarbaevtyń «Bolashaqqa baǵdar. rýhanı jańǵyrý» jáne «Uly dalanyń jeti qyry» maqalalarynda qazaqtyń tarıhy men onyń qundylyqtary, olardy jańasha jańǵyrtý men jańartý joldary jaıly aıtylǵan. Elimizdiń túp tarıhyn zertteý men ulttyq muramyzdy álemge áıgileýge baǵyttalǵan iri jobalar aıtylǵan. Dala folklory men mýzykasyn qaıta jańǵyrtý baǵytynda atqarylatyn jumystar barysy saralanǵan. Biz - salt-dástúrge óte baı elmiz», - dedi Álıma Ábdiqalyqova.
Odan keıin ekspedıtsııa músheleri Syrdarııa aýdanyndaǵy «Jalyn» lagerinde boldy. Óner ekspedıtsııasy músheleri oqýshylarǵa kontserttik baǵdarlamamen birge ulttyq mýzykalyq aspaptar týraly áńgimelep berdi. Osy maqsatta «Atadan qalǵan asyl mura» atty tanymdyq shara ótkizdi. Onda lager tynyǵýshylary 40 jyldam astam tarıhy bar qaladaǵy Qazanǵap atyndaǵy mýzykalyq kolledj stýdentteriniń halyqaralyq deńgeıde oryndap júrgen shyǵarmalarynyń shyǵý tarıhymen tanysty. Atalmysh shara barysynda oqýshylar jetigen, qylqobyz, sherter sekildi ulttyq mýzykalyq aspaptardyń shyǵý tarıhymen tanysty.
Óner ekspedıtsııasynyń músheleri dál osyndaı mádenı sharany Qyzylorda qalasyndaǵy «Syrdarııa» tynyǵý lagerinde de uıymdastyrdy. Onda halqymyzdyń turmys-tirshiliginen, salt-sanasynan, ádet-ǵurpynan habar beretin mýzykalyq aspaptar jaıynda syr shertip, óz ónerin kórsetip qaıtty.
Budan buryn Qyzylordada latyn álipbıi jóninde semınar ótkenin habarlaǵan edik.
