Qyzylordada ulttyq dástúrdi dáripteıtin arnaıy joba júzege asady

QYZYLORDA. QazAqparat - Qyzylorda oblysynda ulttyq salt-dástúrdi nasıhattaıtyn «Tal besikten jer besikke deıin...» jobasy júzege asady, dep habarlaıdy QazAqparat tilshisi.

Oblystyq «Rýhanı jańǵyrý» ortalyǵynyń mamandary atalmysh jobany qolǵa alatyn bolady. Byltyr ortalyq mamandary aımaqtyń ardagerler keńesi, saıası partııalar jetekshileri men úkimettik emes uıym múshelerimen kezdesip, bul baǵytta kóptegen máselelerdi tarazyǵa salǵan edi. Atalmysh joba sol jıyn barysynda oǵan qatysýshy azamattardyń zor qoldaýyna ıe boldy.

«Joba aıasynda ulttyq salt-dástúrlerdi nasıhattaı otyryp, búgingi ýaqyt talabyna sáıkes keletin dástúrlerdi jańǵyrtýdy qolǵa almaqpyz. Sondaı-aq, qazirgi toı ótkizý dástúrine de pragmatıkalyq kózqaraspen qaraǵanymyz jón», - dedi oblystyq «Rýhanı jańǵyrý» ortalyǵynyń basshysy Nurlybek Myńjas.

Ortalyq mamandary budan basqa da birqatar jańa jobalar qolǵa almaq. Atap aıtar bolsaq, úsh tilde «Qorqyttyń danalyq sózderi», «Syr boıynyń sakraldy eskertkishteri: mıfter, hıkaıattar, ańyzdar» jınaǵy, «Alash qaıratkerleriniń Aqmeshit-Qyzylorda kezeńi», «Qorqyt ata kitaby» birneshe nusqalar boıynsha qaıta aýdarylyp, jaryqqa shyǵady. Atalǵan eńbekterdiń barlyǵy Elbasynyń «Uly dalanyń jeti qyry» maqalasyna oraı júzege asatyn bolady. Jobalar Uly dalanyń jeti qyry» maqalasynyń «Túrki áleminiń genezısi», «Uly dalanyń uly esimderi», «Dala folklory men mýzykasynyń myń jyly» arnaıy jobalary aıasynda oryndalady.

Aldaǵy ýaqytta Qyzylorda oblysynda Qobyz kúni atalyp ótedi. Sondaı-aq, byltyr qobyzdyń atasy sanalatyn «Qorqyt ata» murasy ıÝNESKO-nyń materıaldyq emes muralary tizimine engizildi.