Qyzylordada Úkimet músheleri jergilikti kásipkerlermen júzdesti
QYZYLORDA. QazAqparat - Syr óńirinde jumys saparymen júrgen Qazaqstan Respýblıkasy Premer-Mınıstriniń orynbasary Gúlshara Ábdiqalyqova Qyzylorda qalasyndaǵy «Jan-Araı Jem» jaýapkershiligi shekteýli seriktestiginde boldy. Onda qala, aýdan ákimderi, óndiris oryndary, bıznes qurylymdary, kásipodaq uıymdary basshylarymen kezdesti, dep habarlaıdy QazAqparat tilshisi.
Seriktestik 2002 jyldan beri jumys istep keledi. «Jan-Araı» JShS aýylsharýashylyǵy úshin túıirshiktelgen qurama jem shyǵaryp, kúrishti qaıta óńdeýmen aınalysady. Búginde kásiporyn elimizde kúrish óńdýmen aınalysatyn irgeli kásiporynnyń biri sanalady. Munda zaman talabyna saı nemis tehnologııasy arqyly táýligine 150 tonna ónim óndiriledi.
Sondaı-aq, agrokeshen sońǵy jyldarda qus sharýashylyǵyn damýǵa nazar aýdaryp otyr. Qazirgi tańda seriktestik 7 myńǵa jýyq qaz ben úırektiń balapandaryn ósiredi. Osylaısha jergilikti turǵyndardy ekologııalyq taza qus etimen qamtamasyz etýge de jol ashyldy.
Úkimet basshysynyń orynbasary agrokeshen ǵımaratynda ótken qala, aýdan ákimderi, óndiris oryndary, bıznes qurylymdary jáne kásipodaq uıymdary basshylarymen kezdesýinde búgingi kúni elimizde áleýmettik jáne kásipkerlik sala boıynsha atqarylatyn jumystar barysyna toqtaldy.
«Búgingi tańda elimizdegi kásiporyndarda jalaqy bereshegi máselesin boldyrmaýǵa barynsha nazar aýdarylyp keledi. Sonymen qatar, tómengi tabys deńgeıinde aılyq alyp júrgen turǵyndardyń jalaqy mólsherin arttyrýǵa kóńil bólinýde. Bul baǵytta elimizde kóptegen kompanııa qoldaý bildirdi. Osyndaı ıgi bastamalarǵa Qyzylorda oblysy kásipkerleri de ún qosady degen senimdemiz», - dedi Úkimet basshysynyń orynbasary.
Eńbek jáne halyqty áleýmettik qorǵaý mınıstri Berdibek Saparbaev Syr óńirinde jalaqy jóninen bereshek kompanııalar men kásiporyndar sany kóp emes ekenin atap ótti.
«Aldaǵy ýaqytta bul túıtkil tolyqtaı sheshimin tabady degen úmittemiz. Sondaı-aq, qyzylordalyq kásipkerler jalaqy mólsherin arttyrý máselesine kóńil bóledi degen senim zor», - dedi Berdibek Saparbaev.
Esterińizge sala ketelik, búgin QR Premer-Mınıstriniń orynbasary Gúlshara Ábdiqalyqova Qyzylordaǵa keldi.
Úkimet músheleri kópbalaly otbasylarǵa arnalǵan turǵyn úıler qurylysymen tanysty.
Sondaı-aq, Úkimet músheleri jergilikti turǵyndarmen kezdesti.
