Qyzylordada ýchaskelik polıtseıdiń ústinen qylmystyq is qozǵaldy
QYZYLORDA. QazAqparat - Qyzylorda oblysy Qarmaqshy aýdanyna qarasty ІІІ Internatsıonal aýylynyń ýchaskelik polıtseıi Qaırat Baımenovtiń ústinen qylmystyq is qozǵaldy. Ol jergilikti kásipkerdiń jumysyna kedergi keltirip, kásipker qyzmetin jeke maqsatta paıdalanǵan, dep habarlaıdy QazAqparat tilshisi.
Atalmysh másele oblystyq kásipkerler palatasynyń alańynda ótken Kásipkerlerdiń quqyqtaryn qorǵaý jáne sybaılas jemqorlyqqa qarsy is-qımyl jónindegi Keńestiń kezekti otyrysynda qaraldy. Ýchaskelik polıtseı ústinen «Dostyq-jer MK» JShS basshysy men aýyl turǵyndary atynan ujymdyq aryz túsken.
Kásipker Mılıar Arıfovtyń aıtýynsha, ýchaskelik polıtseı Qarmaqshy aýdany, Shoshqakól aýylynda turatyn anasynyń úıine shóp aparyp berýdi suraǵan. Olaı etpegen jaǵdaıda seriktestik tehnıkasynyń júrip-turýyna tyıym salatynyn aıtqan. Nátıjesinde kásipker polıtseıge 8 reıs prestelgen shóp túsirip bergen. Ýchaskelik polıtseı kásipkerden odan bólek saban shóp jetkizip berýdi talap etken. Kásipker atalǵan qyzmetti kórsetýden bas tartady. Odan keıin ýchaskelik polıtseı kásipkerdiń qyzmetine zańsyz aralasyp, tehnıkalaryn toqtatyp, jumysyna kedergi keltirgen. Aýyldyq ardagerler keńesiniń tóraǵasy Saılaý Muhtarov bul jaǵdaıdy rastady.
«ІІІ Internatsıonal aýyly turǵyndary men kásipkerlerden túsken ujymdyq aryzǵa sáıkes, ýchaskelik polıtseı Qaırat Baımenovtiń ústinen qylmystyq is qozǵaldy. Qazir departamenttegi ózindik qaýipsizdik basqarmasy tekserý amaldaryn júrgizip jatyr. Nátıjesi boıynsha tıisti shara qabyldanady», - dedi oblystyq polıtsııa departamenti bastyǵynyń orynbasary Altynbek Ahmetov.
