Qyzylordada tyıym salynǵanyna qaramastan 370 toı ótkizilgen

QYZYLORDA. QazAqparat - Qyzylorda oblysynda karantın shekteýine qaramastan 370 toı ótkizilgeni anyqtaldy, dep habarlaıdy QazAqparat tilshisi.

Bul baǵytta monıtorıng toptary nátıjeli jumys atqaryp keledi. Top quramynda jergilikti atqarýshy organ, Taýarlar men kórsetiletin qyzmetterdiń sapasy men qaýipsizdigin baqylaý departamenti, eriktiler bar. Nátıjesinde 5 shildeden bastap 679 quqyq buzýshylyq anyqtaldy. Onyń ishinde meıramhana men dámhanada toı jasaýǵa qatysty 370 derek tirkelgen. Karantın talaptary kompıýter klýby, býkmeker keńsesi, shashtaraz, dúken jáne bazarlarda saqtalmaǵan.

Shıeli aýdanynyń turǵyny 18 qazanda qudalyq rásimin ótkizgen. Al Qazaly aýdanynyń ortalyǵy - Áıteke bı kentindegi «Baqdaýlet» kdámhanasynda jergilikti turǵyn toı jasaǵan.

«Atalǵan derekter boıynsha Ákimshilik quqyq buzýshylyq týraly kodeksi 425-babynyń 1-bóligimen ákimshilik hattama rásimdeldi. Onda sanıtarııa-epıdemıologııa salasyndaǵy zańnamanyń talaptaryn, sondaı-aq gıgıenalyq normatıvterdi, tehnıkalyq reglamentter buzylǵany kórsetilgen. Hattamalar Shıeli jáne Qazaly aýdandyq taýarlar men qyzmetterdiń sapasy men qaýipsizdigin baqylaý basqarmasyna joldandy», - dep málim etti Qyzylorda oblystyq polıtsııa departamentiniń baspasóz qyzmeti.

Eske sala ketsek, Qyzylorda oblysynda toı ótkizgenderge aıyppul salyndy.