Qyzylordada turmysy tómen jandar tegin nan alyp jatyr

  QYZYLORDA. QazAqparat - Qyzylordalyq janashyr azamattar muqtaj jandarǵa tegin azyq-túlik taratatyn arnaıy oryn ashty. Bul ıgilikti isti jergilikti bankte jáne nesıe korporatsııasynda qyzmet etetin Dáýren Seıitjanov pen Almat Abdýllaev esimdi jigitter qolǵa aldy, dep habarlaıdy QazAqparat tilshisi.

Olar Qyzylorda qalasyndaǵy «Ýnıversam» móltekaýdanynda ornalasqan «Qyzylorda» dúkeninen tegin azyq-túlik taratatyn sóre ashty. Qaıyrymdy jandar dúkennen nan nemese basqa da azyq-túlik ónimderin satyp alyp, sórege qoıyp ketedi. Al muqtaj adamdar sol jerden ózine keregin tegin alýyna bolady.

Dáýren Seıtjanov bul qaıyrymdylyq sharany kópten beri oıǵa alǵanyn aıtady. Osy arqyly muqtaj jandarǵa az da bolsa kómegin tıgizýdi maqsat tutqan.

«Bul oıymdy dosym Almatqa aıttym. «Igi istiń basyna - jaqsy keler qasyna» demekshi, dosym qoldap, iske kirisip kettik. Biz az ýaqyttyń ishinde sóre jasatyp, ony dúken ishine qoıdyq», - deıdi Dáýren.

Qaıyrymdylyq sóresi ornalasqan dúkenge kún saıyn bir baratyn Dáýren Seıtjanov keıbireýler túsinbeı, tegin zatty molynan alyp qalýǵa tyrysyp jatatynyn da jasyrmady.

«Mundaı jaǵdaıda istiń mán-jaıyn túsindirip, sóre tek muqtaj jandarǵa ǵana arnalǵanyn aıtýdan jalyqqan emespiz. Endi eriktiler de atsalyssa deımiz, olar bir mezgil halyqqa túsindirme jumystaryn júrgizse jaqsy bola edi», - dedi D. Seıtjanov.

Biz  budan buryn Qyzylordada jergilikti kásipker muqtaj jandarǵa páter alyp bergenin habarlaǵan edik .