Qyzylordada turmysy tómen otbasylarǵa páter ýáde etken alaıaq sottaldy
QYZYLORDA. QazAqparat - Qyzylordada páter alyp berýdi ýáde etip, bes adamnyń aqshasyn qaltasyna basqan alaıaqqa sot úkimi shyqty, dep habarlaıdy QazAqparat tilshisi.
40 jastaǵy alaıaqtyń ústinen bes adam shaǵym túsirgen. Ol senimge kirý arqyly jábirlenýshilerdiń jalpy somasy 10 mln 500 myń teńgesin qoldy etken. Barlyǵy derlik turmysy tómen otbasylar bolyp tabylady. Sottalýshy aqshany alǵannan keıin bos tasalap otyrǵan jáne mundaı áreketimen 2016 jyldan beri aınalysyp kelgen.
Qylmystyq is Qyzylorda qalalyq №2 sotynda qaralyp, úkim shyǵaryldy.
«Bes adamnan aqshany aldap alǵan alaıaqqa qatysty QR Qylmystyq kodeksiniń 190-baby 3-bóligi 1-tarmaǵy boıynsha qylmystyq is qozǵaldy. Barlyǵy dáleldenip, ol 4 jylǵa bas bostandyǵynan aıyryldy», - dedi Qyzylorda qalalyq №2 sotynyń sýdıasy Kúmisbaı Qosekeev.
Sondaı-aq zardap shekkenderdiń barlyǵyna shyǵyndy ótep berýge úkim etildi.
Degenmen, alaıaqtyń halyqtan jymqyrǵan aqshasy budan da kóp bolýy múmkin. Ázirge 5 adamnan ǵana aryz túsken. Quqyqqorǵaýshylar jańa derekterdiń ashylýy múmkindigin aıtyp, onyń sybaılastaryn izdestirýde.
Esterińizge sala ketelik, budan buryn Qyzylordada alaıaq áıel tórt turǵynnyń 1, 5 mln teńgesin úptep ketkenin habarlaǵan edik.
