Qyzylordada turmysy tómen otbasylar bastapqy tólemsiz baspana alady
Atalmysh jol kartasy Qyzylorda oblysyndaǵy áleýmettik osal tobyn meılinshe qoljetimdi turǵyn úımen qamtamasyz etý maqsatynda qolǵa alynǵan. Ol bastapqy tólemsiz turǵyn úı alýǵa múmkindik beredi.
Nesıelik turǵyn úıdiń kópbalaly otbasylar, múmkindigi shekteýli az qamtylǵan toptarynyń barlyǵyna birdeı qoljetimdi emestigi eskerildi. Osy maqsatta «Nurly jer» baǵdarlamasy aıasynda salynyp jatqan nesıelik turǵyn úılerdi jergilikti bıýdjet esebinen satyp alýǵa jyl saıyn oblystyq bıýdjetten 2 mlrd teńgeden qarjy bólý týraly sheshim qabyldandy.
«Halyqtyń áleýmettik jaǵynan osal toptaryn qoljetimdi baspanamen qamtamasyz etý maqsatynda oblysta arnaıy «Orda» turǵyn úı qurylysynyń «Jol kartasy» ázirlenip, oblystyq bıýdjetten jyl saıyn qajetti qarjy bólý týraly sheshim qabyldandy. Alynǵan páterler turǵyndarǵa keıin óteý quqyǵymen aı saıynǵy jalǵa alý quny sharty boıynsha beriledi. Bul baǵdarlamanyń eń basty ereksheligi - turǵyndar alǵashqy jarnasyn tólemeıtin bolady. Jol kartasyn tıimdi júzege asyrý maqsatynda Qyzylorda qalasy Syrdarııa ózeniniń sol jaǵalaýynda jeke qurylys kompanııalary esebinen salynyp jatqan 18 kópqabatty turǵyn úıdiń (770 páter, 59,4 myń sh.m.) 4 jáne 5 qabattaryndaǵy páterlerdi satyp alý týraly oblys, qala ákimdikteri men qurylys kompanııalary arasynda úshjaqty kelisim jasaldy», - dedi oblys ákimi Qyrymbek Kósherbaev Memleket basshysy Nursultan Nazarbaevtyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýynan týyndaıtyn mindetter saralanǵan aktıv jıynynda.
«Orda» aımaqtyq turǵyn úı baǵdarlamasyna bastapqy tólemsiz tómende kórsetilgen áleýmettik osal toptaǵy azamattar qatysa alady. Oǵan birinshi topqa kóp balaly otbasylar, tolyq emes otbasylar, múgedek nemese múgedek bala tárbıeleýshi otbasylar, jetim balalar men ata-anasynyń qamqorlyǵynsyz qalǵan balalar, birinshi jáne ekinshi top múgedekteri, oralmandarmemlekettik jáne bıýdjettik sala qyzmetkerleri engizilgen. Al ekinshi top boıynsha 2 jyl nekede turǵan, balalary (balasy) bar, erli-zaıyptylardyń jasy 35-ke tolmaǵan (óńirlik baǵdarlamaǵa ótinish berý barysynda), sońǵy 5 jylda jeke menshiginde tirkelgen baspanasy joq, sonymen qatar balalardy (bala) ata-anasynyń biri jalǵyz asyraýshy, tolyq emes, jasy 35-ke tolmaǵan, onyń ishinde ajyrasqan, jesir qalǵan otbasylar osyndaı múmkindikke qol jetkize alady.
Baǵdarlamaǵa qatysýshylaryna tómendegishe talaptar qoıylady. Atap aıtqanda, turǵyn úı qurylys jınaq bankiniń salymshysy bolý tıis. Depozıttik shotta 12 rettik aısaıynǵy jarna mólsherinde aı saıynǵa tólemder 2-bólme úshin 8 jyldyq jalǵa alý tólemi - 35 000 teńge, 11 jyl tólenetin qaryz somasy - 32 200 teńge shamalaıdy. Al 3-bólme 8 jyldyq jalǵa alý tólemi, 43 800 teńge, 11 jyl tólenetin qaryz somasy, 40 480 teńgeni quraıdy.
Elbasy halyqqa Joldaýyn jarııa etken jıynda óńir basshylaryna qoljetimdi jalǵa beriletin turǵyn úılerdiń qurylysyn júrgizip, eń aldymen dárigerlerdiń, muǵalimderdiń, áleýmettik jáne ózge salanyń bilikti mamandaryna jergilikti bıýdjet esebinen jeńildetilgen ıpoteka boıynsha alǵashqy jarnasyn ishinara sýbsıdııalaý máselesin shegine jetkizýdi tapsyrǵan bolatyn.
