Qyzylordada turmysy tómen kópbalaly otbasylarǵa baspana berildi
Esterińizge sala ketelik, atalmysh turǵyn úı kesheninde qurylys jumystary sáýir aıynyń alǵashqy kúnderinde bastalǵan edi. Jalpy sany - 150 turǵyn úı. Atalmysh úılerdiń 149-y turmysy tómen kópbalaly otbasylarǵa berilse, bireýinde halyqqa qyzmet kórsetý ortalyǵy ornalasady. Onyń ishinde 50-i jergilikti bıýdjet esebinen boı kótergen, al 100 úıdi «Bolat Ótemuratov» qaıyrymdylyq qory esebinen el ıgiligine berý josparlanǵan.
Jergilikti basshylyq tarapynan baspanaǵa muqtaj, turmysy tómen kópbalaly otbasylar iriktep alyndy. Olardyń arasynan 149-y áleýmettik jaǵynan az qamtylǵan otbasy esebinde baspana alý múmkindigine qol jetkizdi. Búgingi baspanaly bolǵan shańyraq ıeleriniń qatarynda 7-10 balaly otbasylar az emes.
«Sońǵy jyldary Qyzylorda oblysy qarqyndy qurylys aımaǵyna aınaldy. Bizde turǵyn úı qurylysyn damytý baǵytynda nátıjeli jumystar atqaryldy. Aıta keterligi, sońǵy alty jyldyń ishinde oblys ortalyǵynda 15 shaǵynaýdan paıda boldy. Qanshama adam baspanaǵa qol jetkizdi. Burynǵy jyldarda bizdiń óńirde mundaı deńgeıde qarqyndy qurylys bolǵan emes. Bıyl sondaı qýanyshty jańalyq Syrdarııa ózeniniń sol jaǵalaýyndaǵy aımaqta jalǵasady. Biz onda kópqabatty 13 turǵyn úıdi salyp bitiremiz degen josparymyz bar. Nátıjesinde 2,6 myńnan astam otbasy úlken qýanyshqa keneledi. Nazar aýdararlyq nárse - 2013 jyly Syr óńirinde 230 myń sharshy metr baspana boı kótergen. Bıylǵy mejemiz - 800 myń sharshy metr. Sondaı-aq, búgingi ıgilikti is qoǵam qaıratkeri Bolat Ótemuratovtyń qarjylaı qoldaýymen «Bala meken» jobasy aıasynda az qamtamasyz etilgen kópbalaly otbasylardy qoldaý maqsatynda qolǵa alynǵan edi. Sol izgi istiń alǵashqy nátıjesin búgin kórip otyrmyz. Eki aıǵa jýyq ýaqyt ishinde rekordtyq kórsetkishpen 100 baspanany turmysy tómen kópbalaly otbasylarǵa bergeli otyrmyz. Bul shara Balalardy qorǵaý kúni qarsańynda ótkizilip otyr», - dedi oblys ákimi Qyrymbek Kósherbaev.
Jurtshylyq aldynda oblys ákimi Qyrymbek Kósherbaev oblysta az qamtamasyz etilgen kópbalaly otbasylarǵa arnalǵan 431 páterdiń qurylysyna bıýdjetten qarjy bólingen. Al jyl sońyna deıin 588 páter kópbalaly otbasylarǵa beriletin bolady.
«Bes jyldan beri «Bolat Ótemuratov» qaıyrymdylyq qory» osy baǵytta nátıjeli jumystar atqaryp keledi. Qordyń quryltaıshysy Bolat Ótemuratov óz tarapynan kópbalaly otbasylardy qoldaý baǵytynda naqty ister atqardy. Sondyqtan bizdiń qorymyz Qyzylorda oblysy ákimdigimen birige otyryp, bıyl Syr óńirinde «Bala meken» jobasyn júzege asyrdy. Bul maqsatta 450 mln teńgeden astam qarjy bóldi. Sol jobamyzdyń tabysty iske asqanyna qýanyshtymyz», - dedi «Bolat Ótemuratov qaıyrymdylyq qory» qamqorshylyq keńesiniń tóraǵasy Almas Sharman.
Búgingi saltanatty sharada 7 balanyń anasy Vera Júsipova óz qýanyshymen bólisti.
«Bizge qamqorlyq kórsetken barlyq azamattarǵa alǵysymyzdy bildiremiz. Munda barlyq jaǵdaı jasalǵan. Jaryq, sý, gaz, telefon baılanysy - barlyǵy óz sheshimin tapqan. Meniń turmys jaǵdaıymmen tanysyp, osyndaı qamqorlyq kórsetip jatqan azamattarǵa alǵysymdy bildiremin. Tuńǵysh Prezıdent - Elbasy Nursultan Nazarbaevtyń qamqorlyǵymen turmysy tómen kópbalaly otbasylarǵa laıyqty qoldaý kórsetilip keledi». - dedi Vera Júsipova.
Aıta keterligi, jeke turǵyn úı qurylysyna arnalǵan «Báıterek» shaǵynaýdany 2016 jyly boı kóterdi. Onda 6 myńnan astam adamǵa 10 sotyqtan jer berilgen. Barlyq qajetti ınfraqurylym tartyldy. Al atalmysh shaǵynaýdandaǵy «Bala meken» jobasy aıasynda salynatyn turǵyn úılerdiń jalpy aýmaǵy - 6500 sharshy metr. Aldaǵy jyly bul aýmaqta mektep pen balabaqsha qurylysy boı kóteretin bolady. Taǵy bir eskererligi, Qyzylorda oblysy ózge óńirlermen salystyrǵanda kóp balaly turmysy tómen otbasylarǵa arnap salynǵan turǵyn úı keshenin alǵashqy bolyp paıdalanýǵa berip otyr.
