Qyzylordada túrmege emdik shaıdyń ornyna salynǵan esirtki ótkizilmek bolǵan

QYZYLORDA. QazAqparat – Qyzylordada túrme qyzmetkerleri «erekshe» sálemdemeni anyqtady. Jazasyn óteýshige emdik shaıdyń ornyna salynǵan esirtki ótkizilmek bolǵan, dep habarlaıdy QazAqparat Qyzylorda oblysy boıynsha Qylmystyq-atqarý júıesi departamentiniń baspasóz qyzmetine silteme jasap.

Qyzylorda oblysy boıynsha QAJD-ǵa qarasty №60 mekemede jazasyn ótep jatqandarǵa kelgen sálem-saýqattardy qabyldaý barysynda qyzmetkerler «erekshe» sálemdemeni taýyp alǵan. Atap aıtqanda, 35 qaltashadaǵy emdik shaı qaltashalarynyń quramy almastyrylyp, ornyna untaq tárizdes ári erekshe ıisi bar zat salynǵan bolyp shyqty.

Bul derek jedel túrde «102» arnasyna habarlanyp, mekemege Qyzylorda qalalyq polıtsııa basqarmasynyń jedel-tergeý toby shaqyrtyldy. Tyıym salynǵan zat tárkilenip, sot-hımııalyq saraptama taǵaıyndaldy. Onyń qorytyndysymen kúdik týdyrǵan untaqtyń 47 gr keptirilgen marıhýana ekeni anyqtaldy.

Atalǵan derekke qatysty Qazaqstan Respýblıkasy QK 297-babynyń 1-bóligimen (Esirtki, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, ıemdený, saqtaý, tasymaldaý, jóneltý ne ótkizý) sotqa deıingi tergep-tekserý jumystary júrgizilip jatyr.

Foto: Qyzylorda oblysy boıynsha QAJD