Qyzylordada túrmege 10 telefon men qýattaǵysh qurylǵysyn ótkizbek bolǵan

NUR-SULTAN. QazAqparat – Qyzylordada túrmege 10 uıaly telefon jáne qýattaǵysh quraldaryn ótkizbek bolǵan eki er adam ustaldy. Bul týraly Qyzylorda oblysy boıynsha Qylmystyq-atqarý júıesi departamentinen málim etti, dep habarlaıdy QazAqparat.

«13 shilde kúni Qyzylorda oblysy boıynsha QAJ departamentine qarasty ZK-169/5 mekemesi jedel bóliminiń qyzmetkerlerine shuǵyl aqparat túsken. Mekeme aımaǵynda júrgen 2 adam kúdik týdyrǵan. Mekeme qyzmetkerleri jedel túrde 102 nómirine habarlap, mekemege Qyzylorda qalalyq Polıtsııa basqarmasynyń jedel-tergeý toby shaqyrtyldy. Ustalǵandardyń birin tekserý barysynda skotchpen oralǵan zattan 5 uıaly telefon, 3 qýattaǵysh qurylǵysy jáne ekinshi kúdikti er adamnyń sómkesinen plastıkalyq bótelkege jasyrylǵan taǵy 5 telefon, 3 qýattaǵysh pen 2 qulaqqap tárkilendi», - delingen departament habarlamasynda.

Atalǵan derek boıynsha QR ÁQBtK-niń 481-babyna sáıkes eki kúdiktiniń is-qujattary protsessýaldyq sheshim qabyldaý úshin Qyzylorda qalalyq ákimshilik sotyna joldandy.