Qyzylordada túrmede jatyp, terrorızmdi nasıhattaǵan eki adam anyqtaldy

QYZYLORDA. QazAqparat - Qyzylordada túzeý mekemesinde jazasyn ótep júrgen eki azamat dinı mazmundaǵy qolmen jazylǵan paraqtardy saqtaǵany úshin taǵy da bas bostandyǵynan aıyryldy, dep habarlaıdy QazAqparat tilshisi.

Bul oqıǵa bıylǵy jyldyń aqpan jáne sáýir aılarynda oryn alǵan. Aldymen túzeý mekemesinde jazasyn ótep júrgen adamnan dinı mazmundaǵy qolmen jazylǵan paraqtar tabylǵan edi. Dál osyndaı jaǵdaı sáýir aıynda sol jerde jazasyn ótep júrgen taǵy bir azamattan tárkilendi.

«Tergeý amaldaryn júrgizý barysynda eki azamattyń da destrýktıvti dinı aǵymyn ustanýshy ekeni anyqtaldy. Olar óz aınalasyndaǵy qamaýda júrgen ózge adamdarǵa terrorızmdi nasıhattaýǵa tyrysqan. Atalǵan derek boıynsha QR Qylmystyq Kodeksiniń 256-babynyń 1-bóligimen sotqa deıingi tergep-tekserý amaldary júrgizildi. Onda terrorızmdi nasıhattaý nemese terrorızm aktisin jasaýǵa jarııa túrde shaqyrý jaǵdaıy kórsetilgen. Olardyń qylmystary tolyǵymen dáleldendi», - dep málim etti Qyzylorda oblystyq polıtsııa departamentinen.

Qyzylorda qalalyq sotynyń úkimimen sottalýshylar kináli dep tanyldy. Olarǵa 1 jyl 6 aı jáne 3 jyl 6 aı merzimge bas bostandyǵynan aıyrý jazasy taǵaıyndaldy.

Budan buryn Qyzylordada mal urlyǵyn kásip etkender qolǵa túsken edi .