Qyzylordada túrkitildes elder jastarynyń halyqaralyq festıvali ótedi
«Túrki álemin toǵystyrǵan - Syr eli» atalatyn festıval 19-21 qyrkúıek kúnderi Qarmaqshy aýdanyndaǵy «Qorqyt Ata» memorıaldyq kesheninde bolady.
Tuńǵysh Prezıdent - Elbasy Nursultan Nazarbaevtyń «Bolashaqqa baǵdar: rýhanı jańǵyrý» baǵdarlamasy negizinde ótkiziletin shara tuńǵysh ret qolǵa alynyp otyr.
«Halyqaralyq sharanyń basty maqsaty - túrkitildes elder jastarynyń qarym-qatynasyn nyǵaıtý, ortaq tarıh pen qundylyqtaryn nasıhattaý, jastar saıasatynda oń bastamalar boıynsha tájirıbe almasý. Oǵan elimizdiń barlyq óńirimen birge Túrkııa, Tatarstan, Ózbekstan jáne Ázerbaıjan elderinen shyǵarmashyl jáne ónerpaz jastar qatysady dep kútilýde», - deıdi sharany uıymdastyrýshylar.
Syr óńirinde túrki jurtyna ortaq tarıhı qalalar bar jáne osy jerden belgili tulǵalar shyqqan. Jankent shahary kezinde oǵyzdardyń astanasy bolsa, túrkilerdiń ortaq abyzy - Qorqyt babanyń máńgilik damyl tapqan mekeni Syr topyraǵynda jatyr.
Buǵan deıin «Bolashaqqa baǵdar: rýhanı jańǵyrý» baǵdarlamasy aıasynda jáne Qazaqstannyń Ózbekstandaǵy jylyna oraı qyzylordalyq ardagerler Ózbekstan elindegi qazaq tarıhyna qatysty mádenı oshaqtardy aralap qaıtqanyn jazǵan edik.
