Qyzylordada turǵyndarynyń ortasha ómir súrý jasy uzardy
QYZYLORDA. QazAqparat - Qyzylorda oblysynda jergilikti turǵyndardyń ortasha ómir súrý jasy uzardy, dep habarlaıdy QazAqparat tilshisi.
Sońǵy derekter boıynsha oblys halqynyń ortasha ómir súrý jasynyń uzaqtyǵy 72,6 jasty quraǵan. Ol 2013 jyly 70,6 jasty shamalaǵan edi.
«Aımaqta adamdardyń ólim-jitim deńgeıi 1,8 paıyzǵa tómendegen. Olardyń arasynda qan-aınalym júıesinen, jaraqat pen ýlaný, qaterli isik pen ókpeniń qurt aýrýy syndy syrqat saldarynan bolatyn ólim-jitim deńgeıi azaıǵan», - dedi Qyzylorda oblystyq densaýlyq saqtaý basqarmasy basshysy Aqmaral Álnazarova.
Syr óńirinde bul baǵytta irgeli ister atqarylyp keledi. Aımaq medıtsınasynda zamanaýı tehnologııalar engizilip otyr. Sondaı-aq, materıaldyq-tehnıkalyq bazany kúsheıtýge nazar aýdarylady. Sońǵy eki jylda oblys boıynsha 25 medıtsınalyq nysan el ıgiligine berilgen. Mamandar tapshylyǵy máselesin joıý da árdaıym basshylyq nazarynda.
