Qyzylordada turǵyndary túgel jumyspen qamtylǵan aýyl bar

QYZYLORDA. QazAqparat - Aýdan ákimi Muhtar Orazbaevtyń el aldyndaǵy esebi Qosjar aýyldyq okrýginde jalǵasty, dep habarlady QazAqparat HAA tilshisi Aral aýdandyq ákimdigine silteme jasap.

Esepti kezdesý barysynda ótken jyly atqarylǵan aýqymdy sharalar basa aıtyldy. Atap aıtqanda, Qosjar aýylyndaǵy uzyndyǵy 1100 metrdi quraıtyn kóshege qıyrshyq tas jolyn salýǵa «Jol kartasy - 2020» baǵdarlamasy boıynsha 14 937 966 myń teńge qarjy qaralyp, tıisti jumystar jasaldy. Atalǵan kóshege jaryqtandyrý jumystary da júgizilgen. 

Sonymen qatar, aýyldyq okrýgtiń zor jetistiginiń biri jumyssyzdyq máselesiniń bolmaýy. Sebebi, jergilikti 76 adam bilim oshaǵynda jumyspen qamtylsa, «Qamystybas balyq pıtomnıgi» RMQK-ynda 76 aýyl turǵyny turaqty jumyspen qamtylǵan. 

Esepti baıandamasynda aýyl ákimi M.Ábdikerov, aýyldyq okrýg boıynsha sharýa qojalyqtarynyń sany da jyl sanap artyp kele jatqanyn jetkizdi. Sonyń ishinde, jeke kásipker Ǵalııa Shaǵambaeva «Sybaǵa» baǵdarlamasy boıynsha 1 mln 900 myń teńge nesıe alyp, 1 bas ógiz, 10 bas analyq sıyr alsa, «Dosbol» sharýa qojalyǵy «Qulan» baǵdarlamasymen 4 mln teńge alyp, 2 bas aıǵyr jáne 14 bas bıe alyp, kásibin órbitýde.  

Sondaı-aq, jeke kásipker esebinen  2017-2018 jyldary kirpish zaýytyn salý josparlanyp otyr. Bul aýmaqtyń turmys deńgeıin kóterýge, halyq sanynyń artýyna úlken septigin tıgizeri anyq.

Osylaısha ótken jyldyń aýqymdy isterin oı eleginen ótkizgen esepke turǵyndar belsene qatysyp, bir aýyzdan júrgizilip jatqan memleket saıasatyna rıza ekendikterin bildirip, aýdan basshysynyń esebine oń baǵa berdi.