Qyzylordada turǵyndarǵa 10 myńnan astam taýar túrin usynatyn kóterme dúken ashyldy
QYZYLORDA. QazAqparat-Qyzylorda qalasynda azyq-túlik jáne azyq-túlik emes taýarlaryna baǵa turaqtylyǵyn qamtamasyz etý maqsatynda jańadan iri saýda oryndaryn ashý úshin jergilikti jáne syrttan ınvestorlar tartý jumystary júıeli túrde júrgizilip keledi. Búgin, osyndaı jumystardyń nátıjesinde qala móltek aýdandarynyń birinde «QYZYLORDA OPTOMARKET» saýda ortalyǵy ashyldy, - dep habarlady QazAqparat HAA tilshisi qalalyq ákimdikke silteme jasap.
Saýda ortalyǵynyń ashylý saltanatyna qala ákimi Nurlybek Nálibaev qatysty.
«Turǵyndarǵa jaıly da sapaly saýda oryndaryn usynyp, qalamyzda kásipkerlik nysandarynyń sanyn arttyryp, jańadan jumys oryndaryn ashyp otyrǵany úshin joba basshylyǵyna rııasyz alǵysymdy bildiremin jáne jańa bastamalaryńyzǵa tabys, kásipterińizge bereke tileımin.- dedi ákim.
Munan keıin, qala ákimi Nurlybek Mashbekuly jańadan ashylǵan saýda ortalyǵynyń jumysymen tanysyp, el ıgiligi jáne qala halqynyń áleýmettik jaǵdaıyn jaqsartý úshin qyzmet jasaýǵa nıetti kásipkerlerdi, qaı kezde de qoldaýǵa daıyn ekenin jetkizdi.
Kásipker E.Eskendir qalamyzdaǵy Ǵ.Músirepov kóshesinde ornalasqan bul saýda ortalyǵyn ashýǵa 70 mln. teńgeden astam qarjy jumsasa, onyń 40 mln. teńgesin «Damý» kásipkerlikti damytý qory» AQ-y arqyly 8,5 paıyzben jeńildetilgen nesıe alǵan.
Eki myń sharshy metr aýmaqty alyp jatqan «QYZYLORDA OPTOMARKET» saýda ortalyǵy qala turǵyndaryna 10 myńnan astam taýar túrlerin usyna alady.
Turǵyndarǵa saýda jasaýǵa ynǵaıly barlyq jaǵdaılar jasalǵan jáne 60 avtokólikke arnalǵan avtoturaq qarastyrylǵan.
Munan bólek, saýda ortalyǵynyń jeke kondıterlik ónim jáne nan shyǵaratyn tsehtary óz tutynýshylaryna 20-dan astam nan ónimderin usynady.
Taǵy bir ereksheligi, saýda qatarlarynda otandyq ónimderge basymdyq berilgen, sonymen qatar azyq-túlik ónimderiniń baǵa turaqtylyǵyn qamtamasyz etý maqsatynda qaladaǵy basqa saýda úıleri men bazarmen salystyrǵanda baǵasy 10 paıyzdan - 15 paıyzǵa deıin tómen, ıaǵnı áleýmettik dúken baǵytynda qyzmet kórsetedi.
Bıznestiń áleýmettik jaýapkershiligin arttyrýdy basty maqsat tutqan, zamanaýı talaptarǵa saı keletin bul saýda ortalyǵynda jańadan 45 adam jumyspen qamtylatyn bolady.
Buǵan deıin, «Alpamys» jeke kásipkerligi qalamyzdaǵy «Shuǵyla» jáne «Ýnıversam» móltek aýdandarynan «Qyzylorda» ataýymen dúkender jelisin iske qosqan bolatyn.
