Qyzylordada turǵyndardyń 98,9 paıyzy ortalyqtandyrylǵan sý júıesine qosylǵan
Óńirde barlyǵy 234 eldi meken bar. Olardyń arasynda 4-i qala (Qyzylorda, Aral, Qazaly, Baıqońyr) bolsa, qalǵany aýyldyq mekender sanalady. Qalalyq oryndar taza aýyz sýmen tolyqtaı qamtylsa, aýyldyq jerlerdiń basym bóligi taza aýyz sýdy tutynyp otyr.
Oblysta barlyǵy 230 aýyldyq eldi mekenniń 195-i Aral-Sarybulaq, Oktıabr, Jıdeli toptyq sý qubyrlary jáne ortalyqtandyrylǵan ishki sý taratý júıesine qosylǵan. Onda turatyn adamdar sany 439 myńǵa jýyq. Sondaı-aq, 35 eldi meken ortalyqtandyrylmaǵan nemese halyq sý taratý jelisi joq oqshaý skvajınalardan, qudyqtardan, tasymal arqyly sý ishedi. Olardyń sany 9,7 myń adamdy nemese aýyl halqynyń 2,2 paıyzyn quraıdy.
«Bıyl oblysta birqatar eldi mekenderde aýyz sý sapasyn jaqsartý maqsatynda tıisti jumystar qolǵa alynady. Atap aıtqanda, Qazaly aýdany Janqoja batyr, Maıdakól eldi mekenderinde servıstik sý jelisi, Qarmaqshy aýdany Tóretam aýyldarynda sý júıesiniń qurylysy júrgiziledi. Odan keıin Baıqońyr qalasynda káriz júıesin jańartý, Jańaqorǵan aýdandaryndaǵy Tómenaryq, Sýnaqata, Ekpindi eldi mekenderinde sý júıesin jańartý jáne keńeıtý bastalady. Al Jańaqorǵan kentinde 2017-2019 jyldar aralyǵynda ishki sý júıesi salynǵan bolatyn. Ótken jyldan bastap Jańaqorǵan kentinde servıstik jelileri salynýda. Osy atalǵan jobalar bıyl paıdalanýǵa beriledi. Sonymen qatar, Aral aýdany Abaı-Toqabaı jáne Aqbasty eldi mekenderinde Aral-Sarybulaq toptyq sý qubyryna qosý jumystaryn bastaýǵa respýblıkalyq bıýdjetten qarjy bólindi. Jobalardyń qarajaty aýqymdy bolǵandyqtan (jalpy quny – 6,8 mlrd teńge) qurylysy kezeń-kezeńmen iske asady», - dedi oblystyq energetıka jáne turǵyn úı-kommýnaldyq sharýashylyq baskarma basshysynyn orynbasary Erlan Jolamanov.
Basqarma málimetinshe, Jańaqorǵan aýdanynyń 27 aýylyn aýyz sýmen tolyq qamtamasyz etý úshin 2019 jyldyń sońynda Syrdarııa toptyq sý qubyry iske qosyldy. Al Talap toptyq sý qubyrynyń qurylysy bıyl aıaqtalady dep josparlanýda.
