Qyzylordada turǵyndardyń 97 paıyzy ortalyqtandyrylǵan aýyz sý júıesine qosylǵan

QYZYLORDA. QazAqparat - Qyzylorda oblysynda jergilikti turǵyndardy aýyz sýmen qamtý máselesinde oń ózgerister bar. Búgingi kúni oblystaǵy 265 aýyldyq eldi mekenniń 199-y nemese 76,5 paıyzy ortalyqtandyrylǵan aýyz sý júıesine qosylǵan. Bul halyq sanyna shaqqanda 97 paıyzdy quraıdy, dep habarlaıdy QazAqparat tilshisi.

Elbasy tapsyrmasymen 2020 jyly aýyldyq eldi mekenderdiń 80 paıyzyn ortalyqtandyrylǵan aýyz sý júıesine qosý mindeti qoıylǵan. Osyǵan sáıkes 2011-2020 jyldarǵa arnalǵan «Aq bulaq» baǵdarlamasy qabyldandy. Budan keıin birqatar salalyq baǵdarlamalar yqshamdalyp, 2020 jylǵa deıingi Óńirlerdi damytý baǵdarlamasyna biriktirildi. 2015 jyly qabyldanǵan «Nurly jol» baǵdarlamasy arqyly eskirgen aýyz sý júıesin jańǵyrtý jumystary asa qarqyndy júrgizildi.

Atalǵan baǵdarlamalar aıasynda Qyzylorda oblysynda maqsatty ári júıeli jumystar atqarylýda. Atap aıtsaq, 2011-2017 jyldar aralyǵynda bıýdjetten 40 mlrd teńgeden astam qarjy tartylǵan. Sonyń nátıjesinde 2,5 myń shaqyrymǵa jýyq aýylishilik jáne servıstik júıeler jańartyldy, 8,5 myńnan astam sý ólshegish quraldary ornatyldy.

Jaqynda Qyzylordada ótken «Aýyldyq eldi mekenderdi aýyz sýmen qamtamasyz etý» atty respýblıkalyq semınar keńeste QR Aýyl sharýashylyǵy mınıstrligi Sý resýrstary komıtetiniń tóraǵasy Islam Ábishev qazirgi tańda respýblıka boıynsha ortalyqtandyrylǵan aýyz sýmen qamtý kórsetkishi 57,4 paıyzdy quraıtynyna nazar aýdardy. Aýyldyq eldi mekenderdi sýmen qamtý jáne sýdy burý jónindegi biryńǵaı operatordy qurý máselesine nazar aýdarý qajettigi aıtyldy. 

Qyzylorda oblysynda elimizde alǵashqylar qatarynda 2017 jyldyń 1 maýsymynan bastap fılıal negizinde sýmen qamtý jáne sýdy burý jónindegi biryńǵaı operatory quryldy. Atap aıtqanda, jergilikti sýmen qamtý júıeleri kommýnaldyq menshikten respýblıkalyq menshikke, ıaǵnı «Qazsýshar» RMK «Aral» ODSP fılıalynyń teńgerimine berildi.

«Oblysta sýmen qamtý jónindegi biryńǵaı operatordy qurý 2012 jyly bastaldy. Atap aıtqanda, respýblıkada alǵashqylardyń biri bolyp 2017 jyldyń 1 maýsymynan bastap fılıal negizinde sýmen qamtý jáne sýdy burý jónindegi biryńǵaı operatory jumysyn bastady. Biryńǵaı operatordy qurý sýdy sońǵy tutynýshyǵa jiberý boıynsha qyzmetterdi tıimdi, sapaly ári júıeli ótkizýge ári qurylǵylardy paıdalaný jáne jóndeý jumystaryn óz kúshimen júzege asyrýǵa múmkindik beredi», - dedi oblys ákiminiń orynbasary Serik Súleımenov.