Qyzylordada turǵyndardyń 3 mln teńgesin alyp ketken alaıaq áıel sottaldy
QYZYLORDA. QazAqparat - Qyzylorda qalasynda turatyn 39 jastaǵy azamatshanyń alaıaqtyq isi boıynsha 5 jylǵa bas bostandyǵy shekteldi. Ol adamdardyń senimine kire otyryp, olardyń 3 mln teńge aqshasyn ıemdenip ketken, dep habarlaıdy QazAqparat tilshisi.
Ol tanystaryna memlekettik baǵdarlamalar boıynsha arzan baǵada páter alyp berýge járdemdesetini jóninde ýáde bergen. Alaıda ýádesin oryndamaı, onymen qosa alǵan aqshasyn da qaıtarmaǵan. Onyń kinási dáleldenip, qalalyq sottyń úkimimen 5 jylǵa bas bostandyǵy shekteldi.
Oblystyq ishki ister departamentiniń habarlaýynsha, tártip saqshylarymen ótikizilip jatqan proflaktıkalyq sharalardyń nátıjesinde Qyzylorda qalasynyń ishki ister basqarmasynda ótken jyldyń 4 aıymen salystyrǵanda bıylǵy sáıkes kezeńde alaıaqtyqqa qatysty derekter sany 31 paıyzǵa tómendegen.
«Qoǵamdaǵy alaıaqtyq faktilerin azaıtý maqsatynda Qyzylorda qalasynyń ishki ister basqarmasy qala ákimdigimen jáne qalalyq turǵyn úı-kommýnaldyq sharýashylyq jáne turǵyn úı ınspektsııasy bólimi, Jergilikti polıtsııa qyzmetimen birlesip keń aýqymdy is-sharalar ótkizip, halyqqa túsindirý jumystary júrgizildi. Osy oraıda, tártip saqshylary alaıaqtardyń qurbany bolmas úshin saq bolýdy eskertedi»,- dep habarlaıdy oblystyq ishki ister departamenti baspasóz qyzmetiniń mamandary.
Ádiljan Úmbet
