Qyzylordada turǵyn úıdiń podezi órtenip, 13 adam qutqaryldy

QYZYLORDA. QazAqparat - Qyzylorda qalasynda kóp qabatty turǵyn úıdiń podezi órtenip, baspaldaq arqyly 13 adam qaýipsiz jerge kóshirildi, dep habarlaıdy QazAqparat tilshisi.

Keleńsiz jaǵdaı 24 tamyzda saǵat 22.27-te Qyzylorda qalasy, Abaı dańǵyly bes qabatty №28 turǵyn úıde boldy. Órt jóninde 112 qutqarý qyzmetine qońyraý shalynǵan.

«Shaqyrtý boıynsha órtke qarsy qyzmet oqıǵa ornyna jedel jetti. Belgili bolǵany, atalǵan turǵyn úıdiń 2 podeziniń birinshi qabatynda elektr eseptegish pen syrtqy kireberis aǵash esigi janǵan. Adamdar ómirine qaýip tónýine baılanysty órt sóndirýshiler baspaldaq arqyly 13 adamdy syrtqa shyǵardy. Olardyń arasynda altaýy bala. Órt 22.54-te tolyǵymen joıyldy. Qaza bolǵandar men zardap shekkender joq. Órttiń shyǵý sebebi elektr symdarynyń qysqasha tuıyqtalýy», - dep málim etti Qyzylorda oblysy Tótenshe jaǵdaılar departamenti Órt sóndirý jáne avarııalyq qutqarý jumystary qyzmetinen.

Eske salsaq, budan buryn Qyzylorda oblysynda qorada jınalyp turǵan 3000 baý shóp órtenip ketken edi.