Qyzylordada turǵyn úıdegi órt kezinde 38 jastaǵy azamat kúıip qaldy, jaǵdaıy aýyr

QYZYLORDA. QazAqparat - Qyzylorda oblysynda turǵyn úıde bolǵan órttiń saldarynan 38 jastaǵy azamattyń denesin 75 paıyz kúıik shalyp, aýrýhanaǵa jetkizildi. Naýqastyń jaǵdaıy aýyr, dep habarlaıdy QazAqparat tilshisi.

21 maýsymda saǵat 18:45-te Jalaǵash aýdanyna qarasty Buqarbaı batyr aýylynda turǵyn úı janyp jatqany týraly 101 pýltine habarlama tústi.

«Shaqyrtý boıynsha oqıǵa ornyna aýdandyq №11 órt sóndirý bóliminen 5 qyzmetker 1 tehnıkamen bardy. Barlaý sharasynyń nátıjesinde turǵyn úıdiń basym bóligi ashyq jalynmen janyp jatqany belgili boldy. Órt sóndirýshiler bólme ishinde es-tússiz jatqan 38 jastaǵy turǵyn úı ıesin qutqardy. Ony qaýipsiz jerge alyp shyqty. Jedel járdem qyzmeti jetkenshe oǵan №11 órt sóndirý bóliminiń bastyǵy azamattyq qorǵaý maıory Erbol Táýekelov alǵashqy medıtsınalyq kómek kórsetti. Denesiniń 75 paıyzyn kúıik shalǵan azamat dárigerlerdiń qaraýynda. Onyń jaǵdaıy aýyr dep baǵalanyp otyr», - dedi Qyzylorda oblystyq Tótenshe jaǵdaılar departamenti Órt sóndirý jáne avarııalyq-qutqarý jumystary qyzmetiniń baspasóz hatshysy Álııa Erejepova.

Vedomstvo málimetinshe, tilsiz jaý 19:51 mınýtta tolyq sóndirildi. Órttiń shyǵý sebebi men shyǵyny anyqtalýda.

Eske salsaq, budan buryn Qyzylordada 800 sharshy metr aýmaqta janǵan eski shınalar sóndirildi.