Qyzylordada turǵyn úı otqa orandy

QYZYLORDA. QazAqparat - Qyzylorda oblysy Jańaqorǵan aýdanyna qarasty Tómenaryq eldi mekeninde keshe keshkisin turǵyn úı tolyqtaı janyp ketti, dep habarlaıdy QazAqparat tilshisi.

Tótenshe oqıǵa 25 sáýirde jergilikti saǵat 19.45 shamasynda bolǵan. Aýdandyq №14 órt sóndirý bóliminiń 101 baılanys telefonyna sol ýaqytta habar kelip tústi. Aýdan ortalyǵy men Tómenaryq eldi mekeniniń qashyqtyǵy 44 shaqyrymdy quraıdy. Órt sóndirýshiler shaqyrý ornyna kelip jetken sátte okrýgtegi erikti órtke qarsy qurylymynan (5-adam, 1-tehnıka ) úıdi sharpyǵan jalyndy sóndirip jatqandyǵy anyqtaldy. Órt 21.08-de tolyqtaı sóndirildi.

«Oqys oqıǵadan qaza tapqan jáne jaraqat alǵan adamdar joq. Sol ýaqytta úıde 1963 jylǵy áıel men 1986 jylǵy er adam bolǵan. Ekeýi de ekinshi toptaǵy múgedekter. Órt elektr jelileriniń qysqa tuıyqtalýy saldarynan shyqqan bolýy múmkin. Oqıǵaǵa baılanysty is qujattary jınaqtalýda. Qazir anyqtaý jumystary júrgizilýde. Ol zańdy protsessýaldyq sheshim qabyldaý maqsatynda aýdandyq polıtsııa bólimine tergeý rettiligimen joldanady», - dep málim etti oblystyq tótenshe jaǵdaılar departamenti Órt sóndirý jáne avarııalyq-qutqarý jumystary qyzmetiniń baspasóz mamany Álııa Erejepova.

Qazirgi tańda aýyldastary baspanasyz qalǵan otbasyǵa qoldaý kórsetý joldaryn qarastyrýda.