Qyzylordada tún ishinde joǵalǵan 10 jasar qyz aman-esen tabyldy
QYZYLORDA. QazAqparat - Qyzylorda oblysynda tún ishinde joǵalyp ketken 10 jasar qyz bala aman-esen tabyldy, dep habarlaıdy QazAqparat tilshisi.
Oqys oqıǵa búgin, 2 qyrkúıekte 04.30-da bolǵan. Syrdarııa aýdandyq bóliminiń kezekshi qyzmetine jergilikti turǵyn 2010 jyly dúnıege kelgen qyzynyń belgisiz baǵytqa shyǵyp ketip, qaıta oralmaǵany jóninde habarlaǵan.
«Oqıǵa ornyna jedel-tergeý toby baryp, izdestirý sharalaryn júrgizdi. Aýdandyq polıtsııa bóliminiń qyzmetkerleri qyzdy anasymen birge tańerteńge deıin izdedi. Barlyq týysy jáne tanystarynyń úılerin sholyp shyqty. Kósheler men kóp qabatty úılerdiń jertólesi nazarǵa alyndy. Synyptastaryna suraý salyndy. Іzdestirý barysynda saǵat 08.30-de ol Qyzylorda qalasynan tabyldy», - dep málim etti Qyzylorda oblystyq polıtsııa departamentiniń baspasóz qyzmeti.
Bala anasyna aman-esen tapsyryldy. Qazir onyń ata-anasymen jáne ózimen profılaktıkalyq aldyn alý jumystary júrgizilip jatyr.
