Qyzylordada týǵan aǵasynan 12 mıllıon teńge urlaǵan azamat ustaldy
QYZYLORDA. QazAqparat - Qyzylorda oblysynda inisi týǵan aǵasynyń seıfte turǵan 12 mln teńge aqshasyn urlap alyp ketken, dep habarlaıdy QazAqparat tilshisi.
Oqıǵa Jańaqorǵan aýdanyna qarasty Shalqııa aýylynda tirkeldi. Aýyl turǵyny aýdandyq polıtsııa bólimine úıinen qomaqty kólemde aqsha urlanǵany jóninde aryz túsirdi.
Kóp uzamaı polıtseıler qylmys jasaǵan adamdy ustady. Ol aryz bergen azamattyń týǵan inisi bolyp shyqty. Kúdikti - Túrkistan oblysynyń turǵyny, buryn sotty bolǵan.
«Tekserý jumystary barysynda ol týǵan aǵasynyń úıine tereze arqyly kirgeni anyqtaldy. Adamdardyń joqtyǵyn paıdalanyp, jatyn bólmede turǵan seıftiń esigin buzǵan. Sol jerde turǵan 12 mln aqshany alyp ketken. Qazir bul boıynsha QR Qylmystyq kodeksiniń 389-babynyń 3-bóligimen (Ózinshe bılik etý) tergep-tekserý amaldary júrgizilýde», - dep málim etti Qyzylorda oblystyq polıtsııa departamentiniń baspasóz qyzmeti.
Vedomstvo ókilderiniń málimetinshe, qazir oǵan qatysty «eshqaıda ketpeý jáne ózin durys ustaý týraly qolhat» túrindegi bultartpaý sharasy qoldanylǵan. Mán-jaıy anyqtalýda.
Sondaı-aq, Qyzylordada iri mólsherde aldap aqsha alǵan 2 adam ustaldy.
