Qyzylordada tótenshe jaǵdaı talabyn saqtamaǵan 280 turǵyn anyqtaldy
Qyzylorda oblysynda 16 naýryzdan bastap tótenshe jaǵdaı talaptarynyń saqtalýyn qamtamasyz etý maqsatynda jumystar atqarylyp keledi. Bul baǵytta oblys boıynsha reıdter júrgizildi. Sol sharalar barysynda 499 mekeme men oıyn-saýyq oryndary tekserildi. Nátıjesinde tótenshe jaǵdaı talaptaryn buzǵany úshin Ákimshilik kodekstiń 476-babymen 280 quqyq buzýshylyq anyqtaldy.
«Atalǵan quqyq buzýshylyqtar negizinde Qyzylorda qalasynda 161 derek tirkelse, aýdandar boıynsha Aralda - 21, Qazalyda - 21, Qarmaqshyda - 13, Jalaǵashta - 5, Syrdarııada - 11, Shıelide - 18, Jańaqorǵanda - 11 jáne Baıqońyr qalasyndaǵy ókildikpen 19 oqıǵa naqtylandy. Sol arqyly Qyzylorda oblysynyń mamandandyrylǵan ákimshilik sotymen 173 ákimshilik is qaraldy. Ol boıynsha 77 tulǵaǵa aıyppul salynyp, 95 tulǵa ákimshilik qamaýǵa alynǵan», - dep málim etti Qyzylorda oblystyq polıtsııa departamentiniń baspasóz qyzmeti.
Sondaı-aq, áleýmettik jeliler men messendjerlerde jarııalanǵan materıaldarǵa monıtorıng júrgizildi. Jalǵan aqparat taratqan 11 derek anyqtalyp, olar boıynsha QR Qylmystyq kodeksiniń 274-baby 4-bóligimen sotqa deıingi tergep tekserý jumystary júrgizilýde. Oblys aýmaǵyna kiretin avtojoldarda azamattardy medıtsınalyq tekserýden ótkizý maqsatynda 3 sanıtarlyq-ótkizý beketteri jumys atqarýda. Tótenshe jaǵdaı rejımi kezindegi talaptardyń saqtalýyn qadaǵalaý maqsatyndaǵy jumystar jalǵasýda.
Budan buryn Qyzylordada aýyl ákimi tótenshe jaǵdaı kezinde toıǵa barǵanyn habarlaǵan edik. Tótenshe jaǵdaı kezinde oblysta sporttyq, oıyn-saýyq jáne basqa da buqaralyq is-sharalar, sondaı-aq otbasylyq, ataýly is-sharalardy ótkizýge tyıym salynǵan. Soǵan qaramastan Shıeli aýdany Tóńkeris aýylynyń ákimi týysqanynyń úıindegi kelin túsirý toıyna qatysqan. Qazirgi tańda Shıeli aýdanynda koronavırýs ınfektsııasy dıagnozy qoıylǵan 55 naýqas bar. Onyń basym bóligi atalǵan eldi meken turǵyndary.
Sondaı-aq, Qyzylordada aýlasynda toı jasaǵan turǵyn jazalandy.
Qyzylordada bas sanıtar kópshilikti qonaqqa barmaýǵa shaqyrdy. Onyń aıtýynsha, elordadan kelgen stýdent qyz aýylda dostarymen basqosý ótkizgen. Sonyń saldarynan aýylda birneshe adamǵa koronavırýs ınfektsııasy dıagnozy qoıyldy.
Búgin saǵat 12.40-taǵy málimet boıynsha Qyzylorda oblysynda koronavırýs ınfektsııasy dıagnozy qoıylǵan 116 naýqas bar.