Qyzylordada tórt úıde órt bolyp, 8 sıyr órtenip ketti

QYZYLORDA. QazAqparat - Qyzylorda qalasynda bolǵan órt birneshe jeke turǵyn úıdiń aýlasyna taraldy. Órt oqıǵasy saldarynan mal qorada turǵan segiz sıyr órtenip ketti, dep habarlaıdy QazAqparat tilshisi.

Órt 14 shildede saǵat 16.00 shamasynda bolǵan. Tótenshe jaǵdaılar departamentine A.Pýshkın kóshesindegi turǵyn úıdiń biri janyp jatyr degen habarlama kelip túsken.

«Oqıǵa ornyna departamentten 1 tehnıka men 5 qyzmetker bardy. Órt sol kóshede turǵan birneshe úıdiń saraı, tóbe jabyny, mal qora jáne T. Júrgenov kóshesindegi shatyrynyń aǵashyn sharpyǵan. Jedel áreket etý barysynda órt oshaǵynan 3 dana 50 lıtrlik, 1 dana 27 lıtrlik gaz ballony syrtqa shyǵaryldy. Órt saǵat 16.49 -da oqshaýlanyp, saǵat 17.46-da sóndirildi. Oqıǵa saldarynan zardap shekkender men qaza bolǵandar joq. Qyzyl jalyn saldarynan turǵyn úılerdiń birindegi mal qorada turǵan 8 sıyr, 3 taýyq, 1 ıt órtenip ketti», - dedi oblystyq tótenshe jaǵdaılar departamenti baspasóz qyzmetiniń jetekshisi Aıgúl Nurmanova.

Vedomstvo málimetinshe, órtti sóndirýge barlyǵy 45 qyzmetker 10 tehnıka jumyldyryldy. Órttiń shyǵyny men oryn alý sebebi anyqtalýda.

Eske salsaq, Qyzylordada jyl basynan beri 248 órt oqıǵasy tirkeldi.