Qyzylordada tórt ǵasyrlyq batyrdyń saýyty murajaıǵa tapsyrylady
QYZYLORDA. QazAqparat - Táýelsizdigimizdiń 25 jyldyq merekesi qarsańynda Aral aýdanynyń eldi-mekenderiniń birinen HÚІ ǵasyrdyń aıaǵynda ult bostandyǵy jolynda seksennen asqansha at ústinen túspegen Aıdarbek batyr Órisulynyń aq saýyty tabyldy. Bul týraly aýdan ákimdiginiń baspasóz qyzmeti habarlady.
Tórt ǵasyrdan astam ýaqyt urpaqtan-urpaqqa mıras bolyp kelgen jádiger Aral qalasyndaǵy urpaqtarynyń biri, zeınetker Jetkergen Nurǵabylovtyń úıinde saqtaýly. Aqsaqaldyń aıtýynsha, taza bolattan jasalǵan tor kózdi saýyttyń salmaǵy 10 keliden asady.
Ótken jyly Qazaq handyǵynyń 550 jyldyǵyna oraı Aıdarbek batyrdyń urpaqtary onyń at ústindegi aıbyndy beınesinen eskertkish ornatqan. Qolda bar derekterge súıenip tarıhı-tanymdyq kitap shyǵarylǵan.
Batyrdyń urpaqtary aq saýytty aldaǵy ýaqytta jergilikti murajaıǵa tapsyrmaqshy. 
