Qyzylordada toǵyzqumalaqtan halyqaralyq týrnır ótip jatyr
QYZYLORDA. QazAqparat - Qyzylorda qalasynda toǵyzqumalaqtan halyqaralyq týrnır ótip jatyr. Atalmysh shara memleket jáne qoǵam qaıratkeri Nálqoja Ergeshbaevty eske alýǵa arnaldy, dep habarlaıdy QazAqparat tilshisi.
Halyqaralyq týrnır birneshe jyldan beri turaqty túrde ótkizilip keledi. 2017 jyldan beri atalmysh jarys halyqaralyq deńgeıge kóterildi. Oǵan qatysýshylar sany jyldan-jylǵa kóbeıip keledi.
Týrnırdiń ashylý saltanatyna dúnıejúzilik toǵyzqumalaq federatsııasynyń bas hatshysy Maqsat Shotaev keldi. Ol jarysqa qatysýshylarǵa sáttilik tiledi. Ol Qyzylorda oblystyq toǵyzqumalaq federatsııasynyń prezıdentine «Eń úzdik jergilikti federatsııa» alǵys hatyn tabystady.
Sport saıysy bıyl 12-shi márte jalaýyn kóterdi. Bıyl oǵan Aýǵanstan, Ázerbaıjan, Bolgarııa, Bosnııa jáne Gertsegovına, Mońǵolııa, Qyrǵyzstan, Túrikmenstan, Túrkııa jáne Qazaqstannyń ár óńirinen 200-den asa toǵyzqumalaqshy keldi.
Jarys klassıka boıynsha 9 týrda jas ereksheligine sáıkes tórt topta ótkiziledi. Týrnır jeńimpazdary men júldegerlerdiń esimderi 6 naýryz kúni belgili bolady.
