Qyzylordada tigilgen erler jeıdesi shetelge eksporttalyp jatyr
QYZYLORDA. QazAqparat - Qyzylordada «Dalatex» degen markamen erler jeıdesi shyǵyp jatyr. Qazirgi tańda otandyq ónim elimizdiń saýda ortalyqtarynda ǵana emes, Reseı naryǵynda da satylýda. Bul týraly Baq.kz tilshisi habarlady.
Kásiptiń negizin qalaýshy Dilmuhamed Abyzovtyń kıim saýdasymen aınalysqanyna jıyrma jylǵa jýyqtaǵan. Erler jeıdesin sapaly etip tigýge bolatyndyǵyna kóz jetkizgen kásipker ótken jyldyń mamyr aıynda fabrıkasyn iske qosty. Qajetti qural-jabdyqtardy Túrkııadan aldyrdy. Ol úshin «Bıznestiń jol kartasy - 2020» baǵdarlamasy aıasynda nesıe alǵan.
Fabrıkada 35 adam jumys isteıdi. Barlyǵy - jergilikti jerdiń turǵyndary. Olarǵa Túrkııadan arnaıy shaqyrylǵan Mehmet Dýrak degen tehnolog-maman jeıde tigýdiń qyr-syryn úıretken.
«Qazaqstanda fabrıkanyń jumysyn júıege qoıa alatyn tehnolog maman joqtyń qasy. Sol sebepti, Túrkııadan shaqyrýǵa týra keldi», - deıdi fabrıka dırektory Nurlan Serdalıev.
«Dalatex» keń úlgidegi qynama beldi jáne jartylaı uzyndyqtaǵy úlgimen ártúrli matadan tigilgen erler jeıdelerin shyǵarady. Munda kúnine 350 jeıde tigiledi. Jaz mezgilinde bul 450-ge jetedi. Aıyna 8 myń kóılek shyǵarylady.
«Túrkııa fırmalarynan shyǵyp jatqan sapaly jeıdelermen salystyrsaq, bizdiki olardykinen bir mysqal da kem túspeıdi. Buǵan júz paıyz senimdimiz. Matalardy shetelden aldyramyz. Sebebi, bizdiń maqtalar basqa buıymdardy jasaýǵa yńǵaıly bolǵanymen, jeıdeniń matasyna jaraı bermeıdi», - deıdi Nurlan Ótegenuly.
«Dalatex» jeıdeleri Qyzylorda oblysynda satylyp jatyr. Sonymen qatar, bul kóılekterdi Almaty, Astana, Shymkent, Aqtaý, Atyraý qalalarynan da taba alasyz. Buǵan qosa, Reseıdiń Orynbor, Ekaterınbýrg, Astrahan qalalaryna eksporttalýda. ıAǵnı, ol jaqtyń kásipkerleri úshin Túrkııa asqansha, jaqyn jerden sapaly jeıdelerdi tasymaldaǵan tıimdi bolyp otyr.
Saýda oryndarynyń satylymdarynda «Dalatex» jeıdeleri 5500 teńgeden bastalady. Baǵalar kóılektiń túrlerine, matalarynyń sapasyna qaraı ártúrli bolyp keledi.
Fabrıkadaǵy tiginshilerdiń jumysyn úılestirip otyratyn Ulpan esimdi mamannyń aıtýynsha, jumysshylardyń árqaısysynyń óz mindeti bar.
«Biri matany ólshep-kesse, ekinshisi jaǵasyn, jeńin tigedi, úshinshisi túımesin qadaıdy, kelesisi kıimdi útiktep otyrady. Fabrıkadaǵy kásibı tiginshilerdi de, bul ónerden habary joqtardy da arnaıy maman qaıta oqytyp, jeıde tigýdi úıretti», - deıdi ol.
Sóz sońynda fabrıka dırektory Nurlan Serdalıev «Dalatex» jeıdesi - biregeı brend ekenin qaıtalap aıtty. «Sondyqtan, biz Qazaqstandy, qala berdi kórshiles elderdiń naryǵyn jaýlaıtynymyzǵa senimdimiz», - dedi ol.
