Qyzylordada terrorlyq akt jaıly jalǵan habar bergen azamat ustaldy
QYZYLORDA. QazAqparat - Keshe, 20 jeltoqsanda saǵat 15.40 shamasynda Qyzylorda QІІB Jedel basqarý ortalyǵyna belgisiz bir azamat habarlasyp, «Kazkommertsbank» ǵımaratynyń ishine bomba qoıylǵanyn jáne saǵat 4 nemese 5 shamasynda jarylatynyn habarlaǵan.
Oqıǵa ornyna jedel túrde oblystyq Іshki ister departamenti men Ulttyq qaýipsizdik komıteti Qyzylorda oblysy boıynsha departamentiniń kúsh-quraldary jumyldyrylyp, ǵımarattan 100-den asa adam jáne jaqyn ornalasqan keshenderden 50 adam qaýipsiz aımaqqa shyǵarylyp, ǵımarat aýmaǵy qorshaýǵa alyndy. OІІD-niń arnaıy maqsattaǵy qurylym qyzmetkerlerimen jáne qyzmettik izdestirý ıtteriniń kómegimen ǵımarat ishi jáne aýmaǵy tolyq tekserilip, nátıjesinde eshqandaı jarylǵysh zat nemese kúdik týdyrarlyq quraldar anyqtalǵan joq.
Jedel izdestirý sharalary barysynda «jarylǵysh zat» qoıylǵany týraly jalǵan habar bergen 1989 jyly týylǵan azamat anyqtalyp, Ýaqytsha ustaý abaqtysyna qamaldy.
Atalǵan derek Qazaqstan Respýblıkasy Qylmystyq kodeksiniń 273-baby boıynsha Sotqa deıingi tergep-tekserýdiń biryńǵaı tizilimine tirkelip, tergeý amaldary júrgizilýde. Ustalǵan azamattyń kinási dáleldengen jaǵdaıda daıyndalyp jatqan terrorızm aktisi týraly kórineý jalǵan habarlaǵany úshin 6 jylǵa deıingi merzimge bas bostandyǵynan aıyrýǵa jazalanady, dep habarlaıdy Qyzylorda OІІD baspasóz qyzmeti.
