Qyzylordada temirmen tanysynyń basyn jarǵan jigit sotty boldy
QYZYLORDA. QazAqparat - Qyzylordada tanysynyń basyn temirmen uryp, ony aýyr jaraqattaǵan jigittiń 3 jylǵa bas bostandyǵy shekteldi, dep habarlaıdy QazAqparat tilshisi.
Bul qylmystyq is Qyzylorda qalasynyń №2 sotynda qaraldy. Sottalýshynyń ústinen QR Qylmystyq kodeksiniń 106-babynyń 1-bóligimen qylmystyq is qozǵaldy.
Oqıǵa barysy bylaı órbigen. Sot aldyna kelgen B úı aýlasynda tanystarymen syra iship otyrady. Bir sátte ol tanysynyń birin syra alyp kelýge dúkenge jumsaǵan. Tanysy odan bas tartady. Ekeýara eregis bolady. Tanysy sottalýshy B-nyń betinen shapalaqpen salyp qalady. Sol sátte ol qolyna temir alyp jábirlenýshiniń basynan urady. Osylaısha tanysynyń densaýlyǵyna qasaqana aýyr zııan keltiredi.
Sottalýshy óz kinásin moıyndady. Qyzylorda qalalyq №2 soty ony QR QK-niń 106-babynyń 1-bóligimen kináli dep tanyp, 3 jylǵa bas bostandyǵyn shekteý jazasyn taǵaıyndady. Oǵan probatsııalyq baqylaý belgilendi.
