Qyzylordada tekserilgen medıtsınalyq anyqtamanyń úshten biri jalǵan bolyp shyqty
Qyzylorda oblysynda memlekettik kórsetiletin qyzmetter men sybaılas jemqorlyqtyń aldyn alý máseleleri ashyq talqylaýǵa tústi. Basqosýda asa bir qajettilikti týdyrmaıtyn, biraq kóptegen jaǵdaılarda talap etiletin anyqtamalar jaıy da sóz boldy.
«Qazirgi tańda turmystyq sybaılas jemqorlyqty joıý maqsatynda qurylǵan «Aqmeshit - adaldyq alańy» jobalyq keńsesi arqyly mekenjaı, №083, №086 medıtsınalyq jáne ózge de keıbir anyqtamalarǵa taldaý júrgizilip keledi. Nátıjesinde keıbir anyqtamalardy qoldanystan alý jóninde usynys berý josparlanyp otyr. Kóp jaǵdaıda bul qujattar belgili bir sheshim qabyldaýǵa eshqandaı áser etpeıdi», - dedi QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Qyzylorda oblysy boıynsha departamentiniń basshysy Abzal Muhımov.
2017 jyly Qyzylorda oblysy boıynsha densaýlyq saqtaý uıymdary 11 450 №086/e úlgisindegi medıtsınalyq anyqtama bergen. Bul kórsetkish byltyr 2,5 esege artyp ketken. Olardyń sany 28 529-ǵa jetken.
«Oblystyq densaýlyq saqtaý basqarmasymen birge monıtorıng júrgizildi. Nátıjesinde zerttelgen 164 dana №086/e medıtsınalyq anyqtamanyń 53-iniń shynaılyǵy kúmán týdyrdy. Atalǵan derek boıynsha protsessýaldyq sheshim qabyldaý úshin ishki ister organdaryna joldandy. Qazirgi ýaqytta tergep-tekserý jumystary júrgizilýde», - dedi departament basshysy Abzal Muhımov.
Odan bólek osy baǵytta ınternet saıttar men áleýmettik jelilerdegi habarlandyrýlarǵa monıtorıng júrgizildi. Onda sanıtarlyq medıtsınalyq kitapshany, qujattardy daıyndap beretinin aıtqan habarlandyrýlar kezdesken. Sol boıynsha «Jasyryn satyp alýshy» ádisimen jalǵan sanıtarlyq kitapshany ázirleý deregi anyqtaldy. Ol boıynsha tıisti qujattar protsessýaldyq sheshim qabyldaý úshin quzyrly organdarǵa joldandy.