Qyzylordada tehnıkalyq oqý ornynyń bazasy jańartylmaq

QYZYLORDA. QazAqparat - Elbasynyń «Naqty 100 qadam» Ult jospary boıynsha elimizdiń 6 negizgi salalary úshin bilikti kadrlar daıarlaıtyn bazalyq 10 aldyńǵy qatarly bilim berý mekemeleri qataryna I.Ábdikárimov atyndaǵy Qyzylorda agrarly-tehnıkalyq kolledji kirdi, dep habarlaıdy QazAqparat bilim basqarmasynyń baspasóz qyzmetine silteme jasap.

Basqarmadan berilgen málimetterge qaraǵanda, óńirdegi atalǵan oqý orny elimizde júzege asyrylyp jatqan 2015-2019 ındýstrııalandyrý kartasyna engen jobalardy júzege asyrýǵa qajetti jumysshy mamandaryn daıarlaıtyn oqý oryndarynyń qataryna 2 mamandyq boıynsha engen.

Elbasy jarııa etken «Ult josparynyń»  77-qadamynda: Ekonomıkanyń alty negizgi salasy úshin on aldyńǵy qatarly kolledj ben on joǵary oqý ornynda bilikti kadrlardy ázirleý, keıinnen bul tájirıbeni elimizdiń basqa oqý oryndaryna taratý máselesi aıtylǵan. Atap aıtqanda, «Elektrmen qamtamasyz etý» mamandyǵynyń «Tehnık-elektrık» biliktiligi jáne «Esepteýish tehnıkasy jáne baǵdarlamalyq qamtamasyz etý» mamandyǵynyń «Kompıýterlik qurylǵylarǵa qyzmet kórsetýshi tehnık» biliktiligi.

Qazirgi tańda, bilim basqarmasy «Kásipqor-Holdıng» AQ-men kelisimshartqa qol qoıdy. Sonyń negizinde 10 ınjener-pedagog biliktilik arttyrý kýrstarynan ótip keldi. 

Aıta keteıik, atalǵan eki mamandyqtyń oqý materıaldyq bazasyn jańǵyrtý maqsatynda 2017-2018 jyldarǵa respýblıkalyq bıýdjetten 200 mln teńge qarastyrylyp otyr.