Qyzylordada Táýelsizdiktiń názik kelbeti» atty fotojoba bastaý aldy
Atalǵan shara Táýelsizdiktiń 30 jyldyǵyna oraı Qyzylorda oblystyq Qazaqstan halqy Assambleıasy janyndaǵy Analar keńesiniń uıymdastyrýymen shilde aıynda bastaý aldy.
Joba oblys ákimi janyndaǵy áıelder isteri jáne otbasylyq-demografııalyq saıasat jónindegi komıssııanyń qoldaýymen ótkizilýde. Oǵan oblystyq isker áıelder qaýymdastyǵy seriktes retinde belgilengen.
«Atalǵan fotojobaǵa qoǵamdyq qyzmetke belsendi, otbasynda tabysty, mansaptyq ósý bıikterine jetken 30 áıel qatystyrylýda.
Bul jobanyń ereksheligi – Syr óńiriniń áıelderiniń táýelsizdiktiń qalyptasýyna, oblystyń áleýmettik-ekonomıkalyq damýyna qosqan úlesi men rólin naqty mysaldar arqyly kórsetý. Árbir qatysýshy áıeldiń zamanaýı tehnologııalarmen jasalǵan fotoportreti daıyndalýda. Respýblıkaǵa tanymal, talantty fotograf Ramıl Magdeev qatysýshylardyń fotosessııasy jáne fotoportretterin jasaý jumystarymen aınalysýda», - dedi analar keńesiniń tóraıymy, joba avtory Rahıma Ahmetova.
Aıta ketsek, joba - kommertsııalyq, bıýdjettik nemese demeýshilik qarajatty paıdalanbaıdy. Degenmen, osy jobaǵa qatysqysy keletinder jetkilikti.
Jobanyń erekshelikteri: oblysta turatyn etnos ókilderine, sondaı-aq aýyl áıelderiniń qatysýyna basymdylyq berilgen.
Búgingi tańda fotojobanyń 5 túsirilimi ótti. Ár túsirilimde jas urpaqqa qol ushyn berip, bıik ustanym tanytyp, rýhanı jańǵyrý jolynda eńbek etken názik jandar, Táýelsizdik jyldarynda Syr óńiriniń ósip-órkendeýine jáne jalpyulttyq birlik pen kelisimdi saqtaýǵa súbeli úlesin qosqan etnos ókilderi, óńirlik analar keńesiniń músheleri qatysýda. Olardyń árqaısysy óz salasynyń sheberleri, biri - ulaǵatty ustaz, biri - qaıyrymdylyqqa toly izgi jumystardy jasyryn jasap júrgen kásipker, biri - memlekettik salada mártebeli qyzmette júrgen jandar.
Jobanyń qorytyndysy retinde joba qatysýshylarynyń fotoportretteriniń kórmesi ótkiziledi jáne «Táýelsizdiktiń názik kelbeti» atty forým uıymdastyrylady.
Ádiljan Úmbet.