Qyzylordada Táýelsizdiktiń 30 jyldyǵyna arnalǵan sharalar 12 baǵytta iske asýda
Óńirde el egemendiginiń mereıtoılyq is-sharalaryn joǵary deńgeıde atap ótý baǵytynda tıisti is-sharalar júzege asyp keledi. Osy maqsatta 12 taqyryptyq baǵyt belgilengen. Oǵan «Jasampazdyqqa toly jyldar» basty ıdeıasy negizge alynǵan.
Atalǵan baǵytta jyl basynan beri 4347 is-shara júzege asqan bolatyn. Onyń ishinde halyqaralyq deńgeıde 3, respýblıkalyq 11 shara ótkizilgen. Sondaı-aq, óńirde 11 áleýmettik nysan óz jumysyn bastady. Atap aıtqanda, olardyń qatarynda «Bir tereze» qaǵıdaty negizinde úkimettik emes uıymdarǵa qoldaý kórsetý azamattyq ortalyǵy, Qyzylorda qalasyndaǵy tennıs ortalyǵy, Jalaǵash kentinde salynǵan aýdandyq jabyq basseın bar. Sondaı-aq, «Bızneske arnalǵan úkimet» ortalyǵy men Syrdarııa aýdany, A.Toqmaǵambetov aýylynda ornalasqan 3 turǵyn úı paıdalanýǵa berildi. Budan bólek, Jalaǵash, Josaly kentteri kógildir otynmen qamtylyp, Aral aýdanynyń Aqqulaq eldi mekeni, Qazaly aýdany Janqoja, Maıdakól eldi mekenderi aýyz sý júıesine qosyldy.
Bıyl óńirde Táýelsizdiktiń 30 jyldyǵyna oraı Syr óńirinde qos birdeı óndiris orny iske qosylyp, aımaq ekonomıkasynyń ilgerileýine serpin bermek. Olardyń qatarynda «Araltuz» AQ-nyń «As tuzyn óndirý» tsehy men «Qazaq Qamel» JShS-niń «Túıe sútinen qurǵaq untaq shyǵarý zaýyty» jobalary bar. Sondaı-aq, Qarmaqshy aýdanynda jaz-qys mezgilinde balalar demalysy úshin 150 oryndyq lager men Qyzylorda qalasyndaǵy Sh.Esenov atyndaǵy 150 oryndyq bilim berý ortalyǵynyń ashylýy da bıylǵy jyldyń enshisinde.
«Aımaqtaǵy aýqymdy sharalar legi dala akademıgi Ybyraı Jaqaevtyń 130 jyldyǵy men ánshi Roza Baǵlanovanyń 100 jyldyǵyna arnalǵan merekelik sharalarmen jalǵaspaq. Syr súleıi Kete Júsip Eshnııazulynyń 150 jyldyǵyna arnalǵan «Jyrlansyn Táýelsizdik jyrlary» atty respýblıkalyq jyrshy-jyraýlar baıqaýy, Jalańtós Bahadúrdiń 445 jyldyǵyna aıasynda Qazaly aýdanynda eskertkish ornatý da osy jyly júzege asyrylatyn ilkimdi isterdiń qatarynda. Semeı ıadrolyq synaq alańynyń jabylǵanyna 30 jyl tolýyna arnalǵan «Táýelsizdik jetistikteri jáne Halyqaralyq ıadrolyq synaqtarǵa qarsy is-qımyl» atty dóńgelek ústel, «Táýelsiz Qazaqstannyń qalyptasýy men damýyndaǵy Elbasy róli» atty oblystyq ǵylymı-praktıkalyq konferentsııalar ótkizýde josparlanýda», - dep málim etti oblystyq ishki saıasat basqarmasynyń basshysy Mıra Qazbekova.
El táýelsizdigin merekeleý aıasynda «Qaıyrymdy ister marafony» jobasy da qolǵa alyndy. Jyl basynan beri oblystyq volonterler front ofısimen birigip, 22 156 adamdy qamtyǵan 450 shara ótti. 6 548 adamǵa 91,7 mln teńgeniń kómegi berildi. Volonterler front ofısiniń jetekshisi Bolatbek Aıtbenbetovtiń aıtýynsha, jyl sońyna deıin 1000 qaıyrymdy is jasaý josparlanyp otyr.Jalpyulttyq joba bastaý alǵannan beri bilim berý salasy belsendi atsalysyp keledi. Mektep oqýshylarynan quralǵan eriktiler toby úıden oqıtyn, erekshe bilim berýdi qajet etetin oqýshylarǵa kómek qolyn sozýda.