Qyzylordada Tártiptik keńes memlekettik satyp alý zańnamasy talaptaryn buzǵandardyń máselesin qarady

Qarmaqshy aýdandyq turǵyn úı-kommýnal­dyq sharýashylyq, jolaýshylar kóligi jáne avtomobıl joldary bóliminiń bastyǵy M.Erkebaev «Dorstroı» JShS-men jasalǵan kelisim-shartta óreskel qatelikke jol bergen. Onda turaqsyzdyq aıyby 0,1 paıyzdyń ornyna 0,01 paıyz bolyp kórsetilip ketken. Bul óz kezeginde merdiger mekemege zańda kózdelmegen artyqshylyq jasaý bolyp esepteledi. Bir qýan­tarlyǵy, merdiger mekeme jumysty kelisim-shartta kórsetilgen merzimde aıaqtap, memleketke qandaı da bir zııan keltirilgen joq.

Shıeli aýdany Jýantóbe aýylynyń ákimi E.Ahmetov qurylys-qurastyrý jumystaryn júrgizýge arnaıy lıtsenzııasy joq kásipkermen kelisim-shartqa otyrǵan. Munymen qoımaı, jumys tolyq aıaqtalmastan oǵan qarjysyn tolyq aýdaryp beredi. Osyǵan oraı qarjy polıtsııasy qylmystyq is qozǵaıdy. Biraq ákim talaı jerge júgirip júrip, memleketke kelgen zııannyń orny tolǵanyn dáleldeıdi. Sondyqtan da qylmystyq is alynyp, ol Tártiptik keńes qaraýyna jiberilgen. Keńes músheleri atalǵan eki jaǵdaıda da jaýapty tulǵalardyń ózderiniń kinásin moıyndaıtynyn, memleketke zııan kelmegenin jáne oqıǵalardyń oryn alǵanyna bir jyldan asyp ketýi sebepti qatań jazaǵa barmaý týraly sheshimge keldi.

Tártiptik keńes otyrysynda sondaı-aq, keńes jumys jos­paryna saı, Aral aýdanynyń birqatar memlekettik organ­darynda júrgizilgen tekserýler nátıjeleri jarııalandy. Jiberilgen kemshilikterdi zań talaptarymen sáıkestendirý, quqyq buzýshylyqtyń aldyn alý, oryn alǵan quqyq buzýshylyqtarǵa jaýapty qyzmetkerlerge jaýapkershiligin qarap sheshý týraly aýdandyq ákimdikke usynys berildi.