Qyzylordada tanymal tulǵalarmen esimi de, tegi de uqsas azamattar bir aýylda turady
QYZYLORDA. QazAqparat - Qyzylorda oblysynda elimizge belgili tanymal tulǵalarmen esimi de, tegi de uqsas birqatar azamattar bir aýylda turady, dep habarlaıdy QazAqparat tilshisi.
Jańaqorǵan aýdanyna qarasty Besaryq temirjol beketinde 1200 adam turady. Al olardyń arasynda tanymal tulǵalarmen esimi de, tegi de uqsas azamattar barshylyq. Aýylǵa kelgen kisiler Imanǵalı Tasmaǵanbetov, Sábıt Muqanov, Mádına Erálıeva, Jambyl Jabaev syndy azamattardy kórgende osylaısha tańdanys bildirip jatady.
Olardyń arasynda Jambyl Jabaevtyń jasy 43-te, aýylda temirjolshy bolyp eńbek etedi. Besaryqta dúnıege kelgen Sábıt Muqanov búginde elordada qurylysshy bolyp jumys isteıdi. Al Mádına Erálıeva Túrkistan qalasyndaǵy halyqaralyq ýnıversıtette óner jaǵynda bilim alady. Imanǵalı Tasmaǵanbetov bolsa bıyl alty jasqa toldy.
«Otbasym men dúnıege kelgende tanymal óner ıesiniń esimin qoıýdy durys kórgen eken. Bul - maǵan úlken jaýapkershilik. Ózim de óner salasyna beıimmin», - deıdi Mádına Erálıeva.
(Mádına Eralıeva)
Jańaqorǵan aýdanynda olardan basqa da tanymal tulǵalarmen esimi de, tegi de uqsas birqatar azamattar kóp. Shyǵys juldyzy - Ǵanı Muratbaevtyń búgingi «izbasary» polıtsııa qyzmetinde eńbek etedi, sheni - maıor. Ataqty aqynmen attas jáne tegi bir Oljas Súleımenov kent ortalyǵynda kólik júrgizedi. Aqyn Muhtar Shahanovtyń «izbasary» jalyndy jyrlar jazbasa da, án aıtqandy jaqsy kóredi.
(Muhtar Shahanov)
«Úlkender ylǵı «Muhtar Shahanov degen atqa laıyq bol» dep aıtady. Sol áserli sóz áli kúnge deıin meniń ar-namysymdy qaırap, jigerimdi janyp keledi. Sonyń arqasynda keremet atqa daq túsirmeı, tek jaqsy teńeýler estý úshin tyrysyp baǵamyn», - deıdi Muhtar.
Jalpy, Qyzylorda oblysynda tanymal tulǵalarmen esimi de, tegi de uqsas azamattar az emes. Syr óńirinen Abaı Qunanbaev, Ybyraı Altynsarın, Shoqan Ýálıhanov, Kúlásh Baıseıitova, Bıbigúl Tólegenova, Raqymjan Qoshqarbaev, Muqaǵalı Maqataev, Meırambek Besbaev syndy adamdardy tabýǵa bolady.
