Qyzylordada tamyz aıynda jańa emhana paıdalanýǵa beriledi
QYZYLORDA. QazAqparat-Tamyz aıynda memlekettik-jekeshelik áriptestik tetiginiń negizinde Qyzylorda qalasynda aýysymyna 400 kelýshige arnalǵan emhana jumys isteı bastaıdy, dep habarlady QazAqparat tilshisi.
Bul aǵymdaǵy jyly MJÁ kelisim-sharty jasalǵan 2 jobanyń bireýi bolyp tabylady. Bul týraly oblys ákimi Qyrymbek Kósherbaev oblystyq máslıhat depýtattary aldynda jasaǵan esebinde aıtty.
Oblysta búginde memlekettik-jekeshelik áriptestik sheńberinde quny 20 mlrd teńgeden asatyn 21 joba júzege asyrylýda, taǵy 6 joba ázirlený ústinde.
«Densaýlyq saqtaý jelisin ári qaraı ózektendirý úshin oblystaǵy densaýlyq saqtaý obektilerin jańǵyrtýdyń 2017-2019 jyldarǵa arnalǵan jospary jasaldy. Onyń aıasynda 79 densaýlyq saqtaý nysanynyń qurylysy josparlanyp otyr, onyń 76-sy jeke ınvestıtsııalar men jergilikti bıýdjettiń qarajaty esebinen salynbaq», - dedi aımaq basshysy.
Jergilikti atqarýshy bılik bastamasymen Shıeli, Jalaǵash aýdandaryndaǵy apatty jaǵdaıda turǵan 2 ortalyq aýdandyq aýrýhana, Qyzylorda qalasyndaǵy ǵımaraty joq oblystyq onkologııa ortalyǵy máselesi Úkimet nazaryna usynyldy.
